‘సాహో’కి అక్కడ పెద్ద దెబ్బ కొట్టిందెవరు.?

‘సాహో’ సినిమా ప్రీ రిలీజ్‌ బిజినెస్‌ మీద పెట్టిన ఫోకస్‌.. నిర్మాతలు సినిమా రిలీజ్‌ని పెర్‌ఫెక్ట్‌గా ప్లాన్‌ చేయడంలో పెట్టలేకపోయారా.? ఓవర్సీస్‌లో సినిమా రిలీజ్‌ విషయమై కొంత జాప్యం మాత్రమే కాదు, ఇతర లాంగ్వేజెస్‌లో సినిమా రిలీజ్‌ ఇబ్బందికరమైన పరిస్థితులు ఎదురవడానికి కారణమేంటి.? సోషల్‌ మీడియా వేదికగా ఇప్పుడు ఈ అంశాలపై అభిమానుల్లో ఆసక్తికరమైన చర్చ జరుగుతోంది. ముందు అనుకున్న సమయానికంటే కాస్త లేటుగానే ఓవర్సీస్‌ ప్రీమియర్స్‌ షురూ అయ్యాయి.

అయితే, సరైన ప్లానింగ్‌ లేకపోవడంతో తమిళం, హిందీ వెర్షన్ల ప్రీమియర్లు ఆలస్యమయ్యాయి. నిజానికి, ఓవర్సీస్‌ నుంచి వచ్చే టాక్‌ కోసం అభిమానులు కళ్ళు కాయలు కాచేలా ఎదురుచూస్తుంటారు. రాత్రి 10 నుంచి 11 గంటల సమయానికే సినిమాపై ఓ క్లారిటీ వచ్చేస్తుందని అభిమానులు భావించారు. కానీ, అర్థరాత్రి 2 గంటలు దాటినా సినిమా ఎలా వుంది.? అన్న విషయమై అభిమానులకి ఎలాంటి సంకేతాలూ అందలేదు. ఈ మౌనం కాస్తా, సినిమా తేడా కొట్టిందా.? అన్న అనుమానాలకు తావిచ్చింది.

దాంతో అభిమానులు తెలుగు రాష్ట్రాల్లో కొంత డీలాపడ్డారు. చాలా చోట్ల రాత్రంతా హంగామా కొనసాగినా, కొన్ని చోట్ల మాత్రం హంగామా మరీ అంత ఎక్కువగా కన్పించకపోవడానికి ఓవర్సీస్‌ టాక్‌ ఎఫెక్ట్‌ కూడా కారణమని విశ్లేషకులు అభిప్రాయపడ్తున్నారు. అర్థరాత్రి తర్వాత నెలకొన్న డైలమా దెబ్బ ఓపెనింగ్స్‌పై గట్టిగానే పడుతుందా.? అని అభిమానులు ఆందోళన చెందుతున్న పరిస్థితి కన్పిస్తోంది. ‘బాహుబలి’ విషయంలో పెర్‌ఫెక్ట్‌ ప్లానింగ్‌తో అంతా జరిగింది. కానీ, దురదృష్టవశాత్తూ ‘బాహుబలి’ రికార్డుల్ని కొల్లగొడుతుందనుకున్న ‘సాహో’కి రిలీజ్‌ ప్లానింగ్‌ విషయంలోనే గందరగోళం చోటు చేసుకుంది.

ఆంధ్రప్రదేశ్‌ ప్రభుత్వాన్ని కలిసి టిక్కెట్ల ధరల్ని పెంచుకునేందుకు అనుమతి కోరాల్సిన ప్రొడ్యూసర్స్‌, ఆ విషయంలో కూడా వ్యవహరించాల్సిన తీరులో వ్యవహరించకపోవడం గమనార్హం. సినిమా రిజల్ట్‌ సంగతి పక్కన పెడితే ‘ఆలిండియా స్టార్‌’ ప్రభాస్‌ సినిమాకి రిలీజ్‌ సమయంలో ఎదురైన తలనొప్పులు అభిమానుల్ని తీవ్రంగా బాధిస్తున్నాయి. ప్లానింగ్‌ లోపం మాత్రమేనా.? ఎవరైనా పనిగట్టుకుని, సాహోకి అడ్డంకులు సృష్టించారా.? ఫలానా హీరో అభిమానులే సినిమాకి నెగెటివిటీ స్ప్రెడ్‌ చేస్తున్నారంటూ ఆవేదన చెందుతున్న ప్రభాస్‌ అభిమానుల ఆందోళనలో వాస్తవమెంత.?