చంద్రబాబుకు మొహం చాటేస్తున్న బాలయ్య

బావ చంద్రబాబుకు బావమరిది బాలకృష్ణ మొహం చాటేస్తున్నాడట. ఎమ్మెల్యే అయ్యుండి, పార్టీ కార్యక్రమాల్లో అస్సలేమాత్రం చురుగ్గా కనిపించకపోవడం చంద్రబాబుకు రుచించడం లేదు. ‘గతంలో అధికారంలో ఉన్నాం. ఇప్పుడు పరిస్థితి అది కాదు. పార్టీ కోసం పని చేయాల్సిందే. బాధ్యతలు పంచుకోవాల్సిందే.. ‘ అని బాలయ్యకు చంద్రబాబు ఇటీవల సూచించారట. అయితే, బాలయ్య మాత్రం గతంలో తానెలా ఉన్నానో, ఇకపై కూడా అలాగే ఉంటానని ఇంతకు మించి, తన నుంచి రాజకీయంగా ఏదీ ఎక్స్‌పెక్ట్‌ చేయొద్దని బావ చంద్రబాబుకు తేల్చి చెప్పేశారట బాలయ్య.

తెలుగుదేశం పార్టీలో ఇప్పుడీ అంశం ప్రకంపనలు మొదలయ్యాయి. స్వయానా బావమరిదే చంద్రబాబు మాట వినకపోతే, పార్టీలో మిగతా నేతలు, చంద్రబాబును ఎలా లెక్క చేస్తారని టీడీపీకి చెందిన ఓ ముఖ్యనేత తన సన్నిహితుల వద్ద వాపోయారట. మరోపక్క బాలకృష్ణ సూచించిన అభ్యర్ధులకు చంద్రబాబు టిక్కెట్లు ఇవ్వకపోవడంతో, ఆ అసహనాన్ని ఇప్పుడు ఇలా బాలయ్య ప్రదర్శిస్తున్నారనీ మరికొందరు అనుకుంటున్నారట.

చంద్రబాబుకు సన్నిహితంగా ఉండే నేతలు మాత్రం, అసలు పార్టీలో విబేధాలకు తావే లేదని, పార్టీకి ఎప్పుడు అవసరమైనా సేవలు అందించేందుకు బాలకృష్ణ సిద్ధంగా ఉన్నారని చెబుతూ, కొంతమంది కుట్రపూరితంగా బాలయ్యకీ, చంద్రబాబుకీ మధ్య చిచ్చు పెట్టేందుకు ప్రయత్నిస్తున్నారంటున్నారు. టీడీపీలో రచ్చ సంగతి పక్కన పెడితే, బాలకృష్ణ ఇంచక్కా, తమ తదుపరి సినిమా పనుల్లో బిజీగా ఉన్నారు. కె.ఎస్‌.రవికుమార్‌ దర్శకత్వంలో బాలకృష్ణ హీరోగా నటిస్తున్న సినిమా బ్యాంకాక్‌లో షూటింగ్‌ జరుపుకోనుంది. త్వరలో టీమ్‌ మొత్తం బ్యాంకాక్‌ వెళుతుంది. ఇద్దరు హీరోయిన్స్‌ని ఈ సినిమా కోసం ఖరారు చేశారు. మరో హీరోయిన్‌ని ఎంపిక చేయాల్సి ఉందట. బాలకృష్ణ ఈ సినిమాలో ద్విపాత్రాభినయం చేస్తారని తెలుస్తోంది.