సినిమా రివ్యూ : డియర్ కామ్రేడ్

నటీనటులు : విజయ్ దేవరకొండ, రష్మిక మండన్న , శృతి రామచంద్రన్, చారు హాసన్ తదితరులు ..
రేటింగ్ : 2. 75 / 5
మ్యూజిక్ : జస్టిన్ ప్రభాకరన్
కేమెరా : సుజీత్ సారంగ
బ్యానర్ : మైత్రి మూవీస్
దర్శకత్వం : భరత్ కమ్మ
నిర్మాతలు : నవీన్ యెర్నేని, మోహన్ సివిఎమ్. వై రవిశంకర్

టాక్సీవాలా సక్సెస్ తరువాత విజయ్ దేవరకొండ చేసిన నోటా తో పెద్దగా సక్సెస్ అందుకోలేదు .. కానీ ఆ సినిమాతో అటు తమిళంలో కూడా మంచి మార్కెట్ సంపాదించుకున్నాడు రౌడీ హీరో విజయ్ దేవరకొండ. తాజాగా అయన భరత్ కమ్మ దర్శకత్వంలో డియర్ కామ్రేడ్ అంటూ ప్రేక్షకుల ముందుకు వచ్చాడు. సినిమా మొదలైనప్పటినుండి డియర్ కామ్రేడ్ అనే టైటిల్ అందరిలో ఆసక్తి నింపింది .. దానికి తోడు ఈ సినిమాను నాలుగు భాషల్లో విడుదల చేయడంతో భారీ రేంజ్ బజ్ ని క్రియేట్ చేసారు. మరి ఈ డియర్ కామ్రేడ్ ఎవరు ? అతను ఏమి చేసాడు అన్నది తెలియాలంటే కథలోకి వెళ్లాల్సిందే ..

కథ :

బాబీ ( విజయ్ దేవరకొండ ) కాకినాడ యూనివర్సిటీ లో స్టూడెంట్. దాంతో పాటు అక్కడ స్టూడెంట్ యూనియన్ కు లీడర్. అతని ఇంటిపక్కనే ఉండే లిల్లీ ( రష్మిక మండన్న ) తో చిన్నప్పటినుండి కలిసి మెలిసి ఉండడంతో పెద్దయ్యాక అది ప్రేమగా మారుతుంది. ఇద్దరి జోడి బాగుందని అందరు అంటుంటారు. లిల్లీ క్రికెటర్ గా రాణించాలని ప్రయత్నాలు చేస్తుంది. లిల్లీని అమితంగా ప్రేమించిన బాబీ విషయంలో లిల్లీ ఎప్పుడు గొడవపడుతూ నీ ఆటిట్యూడ్ మార్చుకోవాలని చెబుతుంది. విప్లవ భావాలున్న బాబీ తాను ఇలాగె ఉంటాను .. నీకు నచ్చకుంటే నా లైవ్ లో నుండి వెళ్ళిపో అని చెప్పడంతో లిల్లీ అతనితో విడిపోతుంది .. అలా తనలోని కోపాన్ని తగ్గించుకునేందుకు బాబీ దేశాన్ని చుట్టివచ్చే ప్రయత్నం చేస్తాడు. ఆ తరువాత మూడేళ్లకు హైదరాబాద్ లో అనుకోకుండా వీరిద్దరూ కలుసుకుంటారు? ఆ సమయంలో లిల్లీ ఆసుపత్రిలో ఉండడం చూసి బాబీ అసలు విషయం తేలుకుంటాడు? అసలు లిల్లీ ఆసుపత్రిలో ఎందుకు ఉంది ? క్రికెటర్ అవ్వాలన్న లిల్లీ తన డ్రీం నెరవేర్చుకుందా లేదా ? ఆమె డ్రీమ్ కోసం బాబీ ఏమి చేసాడు ? అన్నది మిగతా కథ !

నటీనటుల ప్రతిభ :

ఎప్పటిలాగే హీరో విజయ్ తనదైన మాస్ లుక్ తో ఆటిట్యూడ్ తో ఆకట్టుకున్నాడు. ఈ సినిమా పరంగా అతనిలో విప్లవ భావాలూ కాస్త ఎక్కువగా ఉంటాయి కాబట్టి .. వాటిని చూపించే విషయంలో విజయ్ సూపర్. బాబీ పాత్రలో ఒదిగిపోయాడు. ఇక హీరోయిన్ రష్మిక మండన్న లిల్లీ పాత్రలో ఆకట్టుకునే ప్రయత్నం చేసింది. సినిమాలో ఆమె నిజమైన క్రికెటర్ గా నటించింది మెప్పించింది. సినిమా మొత్తంగా వారి పేర్లు నిక్ నేమ్ లతోనే సాగడం విశేషం. విజయ్ – రష్మిక ల కెమిస్ట్రీ బాగా కుదిరింది. ఇద్దరి జోడి బాగుందంటూ కామెంట్స్ వస్తున్నాయి. సీనియర్ నటులు చారు హాసన్ మాజీ విప్లవ నాయకుడిగా బాగా సూటయ్యాడు. అతను చెప్పే విషయాలు కూడా ఆకట్టుకున్నాయి. మిగతా పాత్రల్లో నటించిన వారు వారి వారి పాత్రల పరంగా బాగా చేసారు. ఈ సినిమా విషయంలో విజయ్ దేవరకొండ చాలా కొత్తగా అనిపించడం విశేషం.

టెక్నీకల్ హైలెట్స్ :

డియర్ కామ్రేడ్ విషయంలో దర్శకుడు ఎంచుకున్న కథ బాగున్నప్పటికీ దాని స్క్రీన్ పైకి తెచ్చే విషయంలో కాస్త తడబడ్డాడు. కథనం చాల నెమ్మదిగా సాగడంతో బోర్ కొట్టింది. కథలో కూడా పెద్దగా ఆసక్తి కలిగించే విషయాలు, ట్విస్ట్ లు పెద్దగా లేకపోవడం మైనస్ గా చెప్పాలి. ఇక మ్యూజిక్ పరంగా మంచి మార్కులే పడ్డాయి. నాలుగు పాటలు ఆకట్టుకున్నాయి. దానికి తోడు ఆర్ ఆర్ కూడా బాగుంది. అయన పాత్ర, ఎమోషన్ తాలూకు ఎఫెక్ట్ ని తెలిసేలా ఆర్ ఆర్ అందించారు. ఇక కెమెరా పనితనం కూడా బాగుంది. చాలా సన్నివేశాలు కొత్తగా అనిపిస్తాయి. ముఖ్యంగా హీరో దేశాన్ని చుట్టొచ్చే సన్నివేశాల్లో ప్రకృతి అందాలను బాగా కవర్ చేసారు. నిర్మాణ విలువలు బాగున్నాయి. అయితే దర్శకుడు ఎంచుకునే కథ ఆకట్టుకున్నా దాన్ని ప్రేక్షకులకు నచ్చేలా సరైన స్క్రీన్ ప్లే లేదు. కథనం చాలా నెమ్మదిగా సాగడం .. తరువాత ఏమవుతుందో ముందే తెలిసిపోవడం లాంటి విషయాలు సినిమాను నీరుగార్చాయి. ఎడిటింగ్ విషయంలో ఇంకా జాగ్రత్తలు తీసుకుంటే బాగుండేది. మొత్తంగా డియర్ కామ్రేడ్ అంటూ దర్శకుడు ఎంచుకున్న ప్రయత్నం బాగుంది. చాలా సమాజంలో జరుగుతున్నా విషయాలను చర్చించాడు దర్శకుడు.

విశ్లేషణ :

డియర్ కామ్రేడ్ గా విజయ్ దేవరకొండ తనదైన నటన కనబరిచి ఆకట్టుకున్నాడు. రష్మిక క్రికెటర్ గా కనిపించి రొటీన్ పాత్రలకు బిన్నంగా ట్రై చేసింది. ఇక విప్లవ భావాలున్న హీరో గా విజయ్ సూపర్. దర్శకుడు ఎంచుకున్న కథ బాగున్నప్పటికీ దాన్ని స్క్రీన్ పై తెచ్చే విషయంలో దర్శకుడు కన్ఫ్యూజ్ అయ్యాడు. స్క్రీన్ ప్లే చాలా నెమ్మదిగా సాగడం తో బోర్ కొట్టింది. పైగా ప్రేక్షకులు ట్విస్టులను కూడా ముందే ఊహించేయడంతో సినిమాలో ఉన్న కిక్ పోయింది. ఇక టెక్నీకల్ విషయాల పరంగా చుస్తే మ్యూజిక్, ఆర్ ఆర్ హైలెట్ గా నిలిచింది. కెమెరా వర్క్ బాగున్నప్పటికీ ఎడిటింగ్ విషయంలో మరింత జాగ్రత్త తీసుకుంటే బాగుండేది. ముఖ్యంగా సెకండాఫ్ మరి సాగదీయడం విసుగు తెప్పిస్తుంది. చక్కని ప్రేమకథ, హీరో హీరోయిన్ల కెమిస్ట్రీ బాగా కుదిరింది. మొత్తానికి డియర్ కామ్రేడ్ అంటూ హీరో విజయ్ చేసిన ప్రయత్నం బాగుందని చెప్పొచ్చు.

ట్యాగ్ లైన్ : డియర్ .. అనిపించాడు !