ఇదీ కేసీఆర్ మార్కు రివెంజ్

కేంద్రంతో తెలంగాణ సీఎం కేసీఆర్ సై అంటున్నారా? మీరు ఒకటేస్తే.. నేను రెండేస్తా అనే రీతిలో వ్యవహరిస్తున్నారా? ప్రస్తుత పరిణామాలు ఔననే అనిపిస్తున్నాయి. రాజకీయాల్లో ఎప్పుడు ఎక్కడ ఎలా వ్యవహరించాలో కేసీఆర్ కు తెలిసినంతగా ఎవరికీ తెలియదనడంలో ఎలాంటి అతిశయోక్తి లేదు. అవసరాలకు అనుగుణంగా వ్యవహరించి పనులు చేయించుకోవడంలో ఆయన నేర్పరి.

అలాంటి కేసీఆర్, కేంద్ర పెద్దల మధ్య ఇటీవల కాలంలో సంబంధాలు అంతగా బాగోలేదనే ప్రచారం జరుగుతోంది. ఎన్నికల ముందు కొంతకాలం వరకు ప్రధాని మోదీ సహా పలువురితో కేసీఆర్ చక్కని సంబంధాలే కలిగి ఉన్నారు. అయితే, అనంతర కాలంలో వారి మధ్య గ్యాప్ పెరుగుతూ వచ్చింది. ఎన్నికల సందర్భంగా ఫెడరల్ ఫ్రంట్ ప్రయత్నాలు చేసిన కేసీఆర్.. మోదీపైనా విమర్శలు గుప్పించారు. దీంతో సహజంగానే ఇరువురి మధ్య దూరం పెరిగింది.

ఇక కేంద్రంలో రెండోసారి అధికారంలోకి వచ్చిన తర్వాత మోదీ.. కేసీఆర్ ను పెద్దగా పట్టించుకోలేదు. ఆయన కోరినా అపాయింట్ మెంట్ ఇవ్వలేదు. ఈ నేపథ్యంలోనే కాళేశ్వరం ప్రాజెక్టు ప్రారంభోత్సవానికి ప్రధాని మోదీని కేసీఆర్ ఆహ్వానించలేదు. మరోవైపు తెలంగాణ సచివాలయం నిర్మాణానికి రక్షణశాఖ ఆధీనంలో ఉన్న బైసన్ పోలో మైదానం తమకు ఇవ్వాలని కోరుతూ కేసీఆర్ చేసిన ప్రతిపాదనకు తొలుత సూత్రప్రాయంగా ఆమోదం తెలిపిన కేంద్రం.. తర్వాతి పరిణామాల నేపథ్యంలో అందుకు విముఖత వ్యక్తంచేసింది.

దీంతో ఈ వ్యవహారంపై ఒకటి రెండుసార్లు ప్రయత్నాలు చేసినా ఫలితం లేకపోవడంతో ఇక ప్రస్తుత సచివాలయం ఉన్నచోటనే కొత్త సెక్రటేరియట్ నిర్మించాలని కేసీఆర్ నిర్ణయం తీసుకున్నారు. బైసన్ పోలో మైదానం ఇవ్వకపోవడంపై తీవ్ర అసంతృప్తి వ్యక్తంచేశారు. ప్రస్తుతం ఆయన వంతు వచ్చింది.

వికారాబాద్ వద్ద 2,934 ఎకరాల భూమిని రక్షణశాఖకు ఇస్తామని గతంలో రాష్ట్ర ప్రభుత్వం పేర్కొంది. అయితే, ప్రస్తుతం ఆ నిర్ణయాన్ని పెండింగ్ లో పెట్టింది. బైసన్ పోలో మైదానం ఇవ్వనందుకు నిరసనగానే ఈ మేరకు నిర్ణయం తీసుకున్నట్టు సమాచారం. బైసన్ పోలో మైదానం ఇస్తేనే ఆ భూమి ఇస్తామని స్పష్టంచేసినట్టుగా తెలుస్తోంది. అలాగే కేంద్ర ప్రభుత్వానికి చెందిన ఇతర విభాగాలు చేపట్టిన భూసేకరణకు కూడా మోకాలడ్డినట్టు సమాచారం. బైసన్ పోలో విషయంలో కేంద్రం అనుసరించిన వైఖరికి ఇది కేసీఆర్ మార్కు రివెంజ్ అనే వ్యాఖ్యలు వినిపిస్తున్నాయి.