Brahmanandam: లెజండరీ యాక్టర్ బ్రహ్మానందం (Brahmanandam) తెరపై నవ్వులు పూయించడమే కాదు.. మైకు చేతబట్టి రాజకీయాలు కూడా మాట్లాడతారని ఊహించగలమా..? కానీ.. అలా చేయగలనని నిరూపించారు. అయితే.. ఆయన ఏ రాజకీయ పార్టీలోనూ చేరలేదు. తన స్నేహితుడికి మద్దతుగా నిలిచి బీజేపీ (BJP) తరపున ఎన్నికల ప్రచారంలో పాల్గొన్నారు.
ప్రస్తుతం కర్ణాటక (Karnataka) అసెంబ్లీకి ఎన్నికలు జరుగుతున్న సంగతి తెలిసిందే. ఎన్నికల వేడి ఊపందుకున్న తరుణంలో చికబళ్లాపుర నియోజకవర్గంలోని గిడిగానహళ్లి, మంచెనహళ్లి, పోశెట్టిహళ్లి, కనగానగొప్ప, జోడి బొమ్మనహళ్లి, పుర.. గ్రామాల్లో ఎన్నికల ప్రచారం నిర్వహించారు. బీజేపీ (BJP) అభ్యర్ధి, మంత్రి డాక్టర్ సుధాకర్ కు మద్దతుగా ప్రచారం చేసారు.
మంత్రి సుధాకర్ తో తనకు ఎప్పటినుంచో స్నేహం ఉందని.. వైద్యునిగా, మంత్రిగా ప్రజలకు ఆయన చేసిన సేవలు తెలుసుకుని ప్రచారం చేస్తున్నానని అన్నారు. ఈ అసెంబ్లీ ఎన్నికల్లో మళ్లీ సుధాకర్ కు ఓటు వేసి గెలిపించాలని కోరారు. ఏపీకి సరిహద్దు జిల్లా కావడంతో చికబళ్లాపురలో ఎక్కువగా తెలుగువారే ఉండటంతో బ్రహ్మానందంను రంగంలోకి దించినట్టు తెలుస్తోంది.