తిరుమల కొండపై.! వెంకన్న గోపురం పై.. డ్రోన్ ఎగిరిందహో.!

తిరుమల తిరుపతి వెంకటేశ్వరస్వామి గోపురం పై డ్రోన్ స్వైర విహారం చేసింది.! తిరుమల మాడ వీధులు సహా.. మొత్తంగా దేవాలయాన్ని చిత్రీకరించింది.!

ఆగమశాస్త్ర నిబంధనల ప్రకారం అయితే ఇలాంటివి జరగకూడదు. నో-ఫ్లై జోన్‌గా ఈ ప్రాంతాన్ని పేర్కొంటున్నారు. విమానాలు సైతం, తిరుమల తిరుపతి దేవస్థానం పైన.. అల్లంత ఎత్తులోనూ ఎగరకూడదు. మరి, డ్రోన్లను ఎలా ఎగురవేసినట్లు.?

ఇండియన్ ఆయిల్ సంస్థకు సర్వే నిమిత్తం అనుమతులు మంజూరు చేశారట. కానీ, అది దేవాలయం మీద ఎగరడానికి కాదు. సర్వే నిమిత్తం అనుమతులు ఇస్తే, ఆ డ్రోన్ తిరుమల తిరుపతి దేవస్థానంపై ఎందుకు ఎగిరినట్లు.? ఇదొక మిలియన్ డాలర్ల ప్రశ్న.

డ్రోన్ నిర్వాహకుల్ని అరెస్టు చేయడం.. అదంతా వేరే చర్చ. అసలు చీమ చిటుక్కుమన్నా స్పందించే విజిలెన్స్ వ్యవస్థ ఏమైందబ్బా.? ఇదే ఇప్పుడు భక్తుల్ని తొలిచేస్తున్న అంశం. తిరుమల తిరుపతి దేవస్థానం అంటే కట్టుదిట్టమైన భద్రతా ఏర్పాట్ల నడుమ వుండే దేవాలయం.

కోట్లాది మంది భక్తుల విశ్వాసలతో ఆడుకునేంత సాహసం డ్రోన్ నిర్వాహకులు ఎలా చేయగలిగారు.? అసలు ఇటీవలి కాలంలో తరచూ తిరుమల తిరుపతి దేవస్థానం ఎందుకు వివాదాల్లోకెక్కుతోంది. లడ్డూల ధరలు, అద్దె గదుల ధరలు.. ఇలా ఒకటేమిటి.? ధరల పెంపు మీదున్న శ్రద్ధ, తిరుమల తిరుపతి శ్రీ వెంకటేశ్వరస్వామి దేవాలయం భద్రతపై ‘పాలకులకు’ లేకపోవడం శోచనీయమే.!

రాష్ట్రంలో దేవాలయాల్లోని రధాలు తగలబడుతున్నా, విగ్రహాలు ధ్వంసమవుతున్నా.. పిచ్చి పిచ్చి కారణాలు చెప్పడం ప్రభుత్వంలో వున్నవారికి అలవాటైపోయింది. ఇంకా నయ్యం, డ్రోన్‌ని ఏ పిచ్చోడో ఎగురవేశాడని చేతులు దులుపుకోలేదు.!