అమరావతి రైతుల పాదయాత్ర: మంత్రుల బెదిరింపులు.! జనం బేఖాతర్.!

రాజధాని అమరావతి విషయంలో మంత్రులు బెదిరింపులకు దిగుతున్నారు. జనాన్ని రెచ్చగొడుతున్నారు. అమరావతి నుంచి అరసవెల్లికి జరుగుతున్న మహా పాదయాత్రను అడ్డుకునేందుకు ప్రభుత్వం స్థాయిలో, పార్టీ స్థాయిలో ఎన్ని ప్రయత్నాలు చేస్తున్నా.. అవి సఫలం కావడంలేదు.

అసలు రాష్ట్రంలోని అధికారం చెలాయిస్తోన్న వైసీపీకి ప్రజస్వామ్యం పట్ల ఇసుమంతైనా అవగాహన వున్నట్లు కనిపించదాయె.! కులాలకతీతంగా, మతాలకతీతంగా, ప్రాంతాలకతీతంగా వ్యవహరిస్తాం.. అంటూ వేదికలెక్కి చెప్పడం తప్ప, నిజంగా అలా వ్యవహరిస్తున్నారా వైసీపీలో ఎవరైనా.?

రాజధాని అమరావతిని ‘కమ్మరావతి’ అనడంలోనే, ప్రజాస్వామ్యం పట్ల, రాజ్యంగం పట్ల కనీస గౌరవం వైసీపీకి లేదని తేలిపోయింది. ఆ మధ్య న్యాయస్థానం నుంచి దేవస్థానం.. అంటూ అమరావతి రైతులు పాదయాత్ర చేశారు. అప్పట్లో రైతుల యాత్ర మీద దాడులు జరుగుతాయని పోలీసు శాఖ అత్యుత్సాహంతో కూడిన ప్రకటనలు చేసింది. కానీ, యాత్ర ప్రశాంతంగానే సాగింది కదా.?

ఇప్పుడు కూడా అదే తంతు. తొలుత పోలీసు శాఖ అనుమతివ్వలేదు.. రైతులే కోర్టును ఆశ్రయించి అనుమతులు తెచ్చుకున్నారు. పాదయాత్ర జరుగుతోంది. పాదయాత్రలో ఎక్కడా రైతులకు ప్రజల నుంచి వ్యతిరేకత వ్యక్తమవడంలేదంటే దానర్థమేంటి.? వైసీపీ మంత్రులు, వైసీపీకి చెందిన చాలామంది నేతలు చేస్తోన్న రెచ్చగొట్టే వ్యాఖ్యల్ని జనం పట్టించుకోవడంలేదనే కదా.?

పశ్చిమగోదావరి జిల్లా దాటి, తూర్పుగోదావరి జిల్లాలో అడుగు పెత్తనివ్వం.. అంటూ అమరావతి రైతులకు ఓ మంత్రి అల్టిమేటం జారీ చేయడాన్ని ఎలా అర్థం చేసుకోవాలి. రైతులు రాజధాని కోసం భూములు ఇచ్చారంటే, అది రాష్ట్రం కోసం ఇచ్చారన్న కనీస విజ్ఞత అధికార వైసీపీలో కొరవడింది. మొత్తం ఆంధ్రప్రదేశ్ రాజధాని కోసం రైతులు భూమినిచ్చారు.

ఏ విశాఖలోనో, ఏ కర్నూలులోనో రైతులు ఇలా స్వచ్ఛందంగా భూములు ఇచ్చే పరిస్థితి వుంటుందా.? అలా రాష్ట్ర ప్రజలు ఆలోచించకుండా వుంటారా.? వికేంద్రీకరణ అంటోంది వైసీపీ ప్రభుత్వం. ఆ వికేంద్రీకరణలో కూడా అమరావతి వుంది కదా.? అలాంటప్పుడు, అమరావతిని ‘కమ్మరావతి’ అని ఎలా అంటారన్న డౌటానుమానం చిన్న పిల్లాడికి కూడా వస్తుంది. ఆ మాత్రం సోయ వుంటే వాళ్ళు వైసీపీ నేతలెలా అవుతారు.?

గుడ్డెద్దు చేలో పడ్డట్టు వికేంద్రీకరణ.. అని నినదించడం తప్ప వైసీపీలో ఒక్కరంటే ఒక్కరికి కూడా మూడు రాజధానుల విషయమై ‘సబ్జెక్ట్ లేదు’.!