సూర్య హీరోగా ‘బందోబస్తు’ అనే సినిమా తెరకెక్కుతోన్న సంగతి తెలిసిందే. ఈ సినిమాలో సూర్యతో పాటు మలయాళ సూపర్‌స్టార్‌ మోహన్‌లాల్‌ కూడా నటిస్తున్నారు. తమిళంలో ‘కాప్పన్‌’గా రూపొందుతోన్న ఈ సినిమాని తెలుగులో ‘బందోబస్తు’ టైటిల్‌తో విడుదల చేస్తూ ఫస్ట్‌లుక్‌ రిలీజ్‌ చేశారు. అయితే ఇక్కడ మాట్లాడుకోవల్సిందేమంటే, ఈ సినిమా తెలుగు వెర్షన్‌ గురించి.
తెలుగులో ఒకప్పుడు సూర్యకి బీభత్సమైన మార్కెట్‌ ఉండేది. ‘సింగం’ సిరీస్‌ సినిమాలు తెలుగులో మంచి సక్సెస్‌ ఇచ్చాయి సూర్యకి. అంతకు ముందు, ఆ తర్వాత పలు చిత్రాలు తెలుగులో విజయవంతమయ్యాయి. కానీ, ఈ మధ్య విడుదలైన సినిమాల లెక్క తేలిస్తే, వరుసగా సూర్య సినిమాలన్నీ తెలుగులో నిరాశే మిగులుస్తున్నాయి. నిరాశ ఏంటీ.? దారుణమైన ఫ్లాప్స్‌ని చవి చూస్తున్నాయి. దాంతో సూర్య మార్కెట్‌ బాగా తగ్గిపోయింది తెలుగులో.
ఇక తాజా సినిమా విషయానికి వస్తే, టైటిల్‌కి తగ్గట్లుగానే మాంచి బందోబస్తుగా ఈ సినిమాని విడుదల చేస్తున్నారు. లైకా ప్రొడక్షన్స్‌ బ్యానర్‌లో భారీ బడ్జెట్‌తో, భారీ కాస్టింగ్‌తో రూపొందుతోన్న చిత్రమిది. సూర్యతో పాటు, గట్టి పోటీ ఇచ్చే నిండైన విగ్రహంలాంటి మోహన్‌లాల్‌ పాత్ర ఈ సినిమాకి ప్రత్యేక ఆకర్షణ. మోహన్‌లాల్‌కి తెలుగులో మార్కెట్‌ బాగానే ఉంది. ‘జనతా గ్యారేజ్‌’ సినిమాతో మోహన్‌లాల్‌ పేరు తెలుగులో మార్మోగిపోయింది. ఆ తర్వాత ఆయన నటించిన మలయాళ చిత్రం ‘మన్యం పులి’ కూడా తెలుగులో డబ్‌ అయ్యి భారీ వసూళ్లు రాబట్టింది. ఆ తర్వాత కూడా ఆయన నటించిన ‘కనుపాప’ తదితర చిత్రాలు ప్రేక్షకులకు గుర్తుండిపోయాయి. ఆ మోహన్‌లాల్‌ ఇప్పుడు సూర్య సినిమాతో ప్రేక్షకుల ముందుకు రానున్నారు.
ఎలాగూ సూర్య సినిమాలకు తెలుగులో మార్కెట్‌ డౌన్‌ కావడంతో ‘బందోబస్తు’ సినిమా ప్రమోషన్స్‌ విషయంలో చిత్ర యూనిట్‌ కాస్త తెలివితేటలు ప్రదర్శిస్తున్నారు. ఈ సినిమాని మోహన్‌లాల్‌ యాంగిల్‌ నుండి ప్రమోట్‌ చేస్తున్నారు. డైరెక్ట్‌గా చెప్పాలంటే మోహన్‌లాల్‌ ఫోటోతో సినిమాకి హైప్‌ తీసుకొస్తున్నారనుకోండి. ఈ వరస చూస్తుంటే, వరుస ఫెయిల్యూర్స్‌తో సతమతమవుతున్న సూర్యని కాపాడే బరువు బాధ్యత ఇన్‌డైరెక్ట్‌గా మోహన్‌లాల్‌ చేతిలో పెట్టేసినట్లే కనిపిస్తోంది.
ఇదిలా ఉంటే, ఈ సినిమాలో సూర్య, మోహన్‌లాల్‌తో పాటు, బాలీవుడ్ నటుడు బొమన్‌ ఇరానీ మరో కీలక పాత్ర పోషిస్తున్నాడు. ఈ మధ్యనే ప్రేమించి, పెళ్లి చేసుకున్న ఆర్య, సాయేషా జంట ఈ సినిమాకి మరో స్పెషల్‌ అట్రాక్షన్‌. ఇక డైరెక్టర్‌ విషయానికి వస్తే, ‘రంగం’ సినిమాతో తెలుగు, తమిళ ప్రేక్షకుల్లో మంచి గుర్తింపు తెచ్చుకున్న కె.వి.ఆనంద్‌ ఈ చిత్రాన్ని ప్రతిష్ఠాత్మకంగా తెరకెక్కిస్తున్నాడు. ‘రోబో’ వంటి అద్భుతమైన చిత్రాలను రూపొందించిన లైకా ప్రొడక్షన్స్‌ బ్యానర్‌ ఈ సినిమాని నిర్మిస్తోంది.