ఔను, కాపులు అమ్ముడుపోతారు: సీఎం జగన్ వ్యాఖ్యలతో ఏకీభవించిన కళ్యాణ్ దిలీప్.!

‘ఔను, కాపులు అమ్ముడుపోతారు. ఈ విషయంలో ముఖ్యమంత్రి వైఎస్ జగన్ మోహన్ రెడ్డి వ్యాఖ్యలతో నేను ఏకీభవిస్తున్నాను..’ అంటూ సంచలన వ్యాఖ్యలు చేశారు ప్రముఖ న్యాయవాది కళ్యాణ్ దిలీప్ సుంకర. కామనర్ లైబ్రరీ పేరుతో ఓ యూ ట్యూబ్ ఛానల్ నిర్వహిస్తున్న కళ్యాణ్ దిలీప్, ఆ యూ ట్యూబ్ ఛానల్ ద్వారా తన అభిప్రాయాల్ని వివిధ అంశాలపై కుండబద్దలుగొట్టేస్తుంటారు.

ఇటీవల ‘కాపు నేస్తం నిధుల విడుదల’ కార్యక్రమంలో ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి మాట్లాడుతూ, కాపు సామాజిక వర్గం ఓట్లను చంద్రబాబుకి అమ్మేయడానికి పవన్ కళ్యాణ్ సిద్ధంగా వున్నారంటూ సంచలన వ్యాఖ్యలు చేసిన విషయం విదితమే. ఈ వ్యాఖ్యలపై స్పందిస్తూ ఓ వీడియో చేశారు కళ్యాణ్ దిలీప్ సుంకర.

‘పవన్ కళ్యాణ్ అమ్మేస్తారా.? లేదా.? అన్నది వేరే చర్చ. కానీ, కాపు సామాజిక వర్గం మాత్రం అమ్ముడైపోవడానికి సిద్ధంగా వుంటుంది. ఈ విషయంలో వైఎస్ జగన్ వ్యాఖ్యలతో నేను ఏకీభవిస్తున్నాను. రెడ్డి సామాజిక వర్గంలో వైఎస్ జగన్ మోహన్ రెడ్డికి పోటీగా ఎవరూ నిలబడరు. కమ్మ సామాజిక వర్గంలో చంద్రబాబుకి పోటీగా ఎవరూ నిలబడరు. కానీ, కాపు సామాజిక వర్గంలో చిరంజీవిని తొక్కేయడానికి కాపు నేతలే అత్యుత్సాహం చూపుతారు. పవన్ కళ్యాణ్ విషయంలోనూ అంతే..’ అని కళ్యాణ్ దిలీప్ సుంకర అభిప్రాయపడ్డారు.

‘భీమవరంలో పవన్ కళ్యాణ్ స్థానికంగా వుండరన్నారు.. పాలకొల్లులో చిరంజీవి స్థానికంగా వుండరన్నారు.. ఆ ప్రచారం చేసింది కాపు సామాజిక వర్గానికి చెందినవాళ్ళే. హిందూపురంలో బాలకృష్ణ అక్కడి ప్రజలకు అందుబాటులో వున్నారా.? లేరు కదా.? కానీ, ఆయన్ని గెలిపించారు. కాపు సామాజిక వర్గానికీ, ఇతర సామాజిక వర్గాలకీ ఇదే తేడా..’ అని కళ్యాణ్ దిలీప్ చెప్పుకొచ్చారు.

‘మేం కాపు సామాజిక వర్గం.. అని చెప్పుకోవడానికి.. ఐకానిక్ లీడర్ ఎవరంటే చిరంజీవి పేరే చెప్పుకోవాలి. కానీ, చాలామంది కాపు నాయకులు, చిరంజీవిని రాజకీయంగా దెబ్బతీశారు. పవన్ కళ్యాణ్‌నీ దెబ్బ తీస్తున్నారు. వాళ్ళంతా కమ్మోళ్ళకో, రెడ్డిలకు అమ్ముడు పోయినట్లే కదా.? ఆ అభిప్రాయంతోనే బహుశా వైఎస్ జగన్ అలా అని వుంటారు..’ అన్నది కళ్యాణ్ దిలీప్ సుంకర విశ్లేషణ.

బానిసత్వానికి అలవాటు పడిపోయిన కొందరు కాపు సామాజిక వర్గ పెద్దల కారణంగానే రాజ్యాధికారానికి కాపు సామాజిక వర్గం దూరమైందని కళ్యాణ్ దిలీప్ సుంకర తన అభిప్రాయాన్ని కుండబద్దలుగట్టేశారు.