మెగాస్టార్ బర్త్ డే స్పెషల్స్: చిరంజీవికి చిన్నారులను మెగా ఫ్యాన్స్ గా మార్చేసిన ‘పసివాడి ప్రాణం’

తెలుగు సినిమాల్లో చిరంజీవి శకం మొదలైన తర్వాత వచ్చిన మార్పులు అనేకం. డ్యాన్సులు, ఫైట్లు, కామెడీ, మాస్, బాక్సాఫీసు లెక్కలు, సినిమా రన్.. ఇలా చాలా మారాయి. ప్రముఖ నటుడు మురళీమోహన్ చెప్పినట్టు.. ఇతర హీరోలందరూ చిరంజీవిలా చేయకపోతే కష్టం అనే పరిస్థితి తీసుకొచ్చారు. ముఖ్యంగా యువత, ప్రేక్షకులను మెప్పించడంలో కొత్త పద్ధతులు తీసుకొచ్చారు. ఈకోవలోనే చిన్నపిల్లలనూ ఆకట్టుకున్నారు. అలా చిరంజీవికి చిన్నారుల్లో విపరీతమైన క్రేజ్ తీసుకొచ్చిన సినిమా ‘పసివాడి ప్రాణం’. ఈ సినిమా తర్వాత చిన్నారులు చిరంజీవిని అభిమానులై తర్వాతి రోజుల్లో వారే మెగా ఫ్యాన్స్ గా మారిపోయారు. పసివాడి ప్రాణం సృష్టించిన ప్రభంజనానికి బాక్సాఫీసు సరికొత్త లెక్కలు లిఖించుకుంది. అంతటి మెగా హిట్ అయింది.

చిన్నారులే మెగా ఫ్యాన్స్..

మాస్ హీరోగా చిరంజీవి చరిష్మా, డ్యాన్స్ స్కిల్స్ ను సినిమాలో పూర్తిగా ఆవిష్కరించారు. ఫైట్లు, డ్యాన్సులు, స్టైల్, మాస్.. అన్ని అంశాలను చిరంజీవికి తగ్గట్టు మార్చారు. ప్రేమించి పెళ్లాడిన అమ్మాయి దూరమై మందుకు బానిసైన మధు పాత్రలో చిరంజీవి కనిపిస్తారు. పుట్టుకతో మూగ, చెవుడు ఉన్న మూడేళ్ల పాపను అక్కరకు చేర్చుకుని.. విలన్ల బారి నుంచి కాపాడటమే సినిమా కథ. ప్రతి సన్నివేశంలో చిరంజీవి పండించిన కామెడీ, స్టైల్ కు ప్రేక్షకులు ఫిదా అయిపోయారు. మాసివ్ స్టైల్లో రాసుకున్న డైలాగులకు చిరంజీవి తన మార్కు డైలాగ్ డెలివరీతో చక్కిలిగింతలు పెట్టిస్తారు. చిన్నారి పాత్రలో సుజిత నటించింది. చిన్నారితో చిరంజీవి సెంటిమెంట్ సన్నివేశాలు ప్రేక్షకుల్ని కంటతడి పెట్టించాయి.

బ్రేక్ డ్యాన్స్ విప్లవం..

పసివాడి ప్రాణంలో చిరంజీవి చూపిన మేజర్ హైలైట్ బ్రేక్ డ్యాన్స్. అప్పటికే డ్యాన్సుల్లో పేరున్న చిరంజీవి తొలిసారి రాప్ సాంగ్ తరహాలో బ్రేక్ డ్యాన్స్ వేయడం ఫ్యాన్స్ కు పూనకాలు తెప్పించింది. ‘చక్కని చుక్కని సందిట బ్రేక్ డ్యాన్స్..’ అనే పాట తెలుగునాట మోగిపోయింది. ఈ పాట తర్వాత తెలుగు సినిమాల్లో బ్రేక్ డాన్స్ కామన్ అయిపోయింది. ప్రతి హీరో బ్రేక్ డ్యాన్స్ వేయాల్సి వచ్చింది. అంతటి ఇంపాక్ట్ చూపించారు చిరంజీవి. చిరంజీవి-విజయశాంతి మధ్య కెమిస్ట్రీ.. కామెడీ సన్నివేశాలు, డ్యాన్సులు ప్రేక్షకులను ఉర్రూతలూగించాయి. చక్రవర్తి చేసిన మాయాజాలం మరోసారి సినిమాకు మేజర్ హైలైట్ అయింది. పాటలన్నీ చార్ట్ బస్టర్లే. బ్రేక్ డ్యాన్స్ పాట ఇప్పటికీ మెగా ఫ్యాన్స్ కు పండుగ.

రికార్డులకు నాంది..

గీతా ఆర్ట్ పతాకంపై అల్లు అరవింద్ నిర్మాణంలో ఎ.కోదండరామిరెడ్డి ఈ సినిమాను తెరకెక్కించారు. 1987 జూలై 23న విడుదలైన పసివాడి ప్రాణం 38 కేంద్రాల్లో 100 రోజులు.. తిరుపతిలో రోజుకు 5 ఆటలతో 175 రోజులు.. నెల్లూరు, అనంతపురంలో 5 ఆటలతో 100 రోజులు ఆడింది. చిరంజీవికి ఇదే తొలి సిల్వర్ జూబ్లీ సినిమా. కలెక్షన్ల పరంగా 5కోట్లు దాటిన తొలి తెలుగు చిత్రంగా నిలిచింది. 100 రోజుల వేడుకను తిరుపతిలోని ఎస్వీ యూనివర్శిటీ గ్రౌండ్స్ లో ఘనంగా నిర్వహించారు. చిరంజీవికి ఇదే తొలి పబ్లిక్ ఫంక్షన్. రష్యన్ భాషలోకి డబ్ అయిన తొలి దక్షిణాది సినిమాగా నిలిచింది. 1988లో రష్యాలో జరిగిన ప్రపంచ చలన చిత్ర మహోత్సవాల్లో పసివాడి ప్రాణం ప్రదర్శించారు. ఈ సినిమా నుంచి వరుసగా ఆరేళ్లపాటు చిరంజీవి ప్రతి ఏటా ఓ ఇండస్ట్రీ హిట్ ఇచ్చారు.