ఉండవల్లి చెంతకు ‘బ్రదర్ అనిల్’.! వైఎస్ జగన్ పంపించారా.?

దివంగత మాజీ ముఖ్యమంత్రి వైఎస్ రాజశేఖర్ రెడ్డికి అత్యంత సన్నిహితుడైన రాజమండ్రి ఎంపీ ఉండవల్లి అరుణ్ కుమార్ దగ్గరకి, వైఎస్సార్ మరణం తర్వాత.. వైఎస్సార్ కుటుంబ సభ్యులెవరూ వెళ్ళింది లేదు.

కానీ, ఇన్నేళ్ళ తర్వాత వైఎస్ షర్మిల భర్త.. ‘బ్రదర్’ అనిల్ కుమార్, ఉండవల్లి అరుణ్ కుమార్ వద్దకు వెళ్ళడం రాజకీయంగా చర్చనీయాంశమవుతోంది. తెలంగాణలో రాజకీయ పార్టీ పెట్టిన షర్మిల, తన సోదరుడు వైఎస్ జగన్ మోహన్ రెడ్డితో అంటీ ముట్టనట్టుగా వ్యవహరిస్తున్నారన్న విమర్శలున్నాయి.

ఇక ఉండవల్లి అడపా దడపా వైఎస్ జగన్ మోహన్ రెడ్డిని ఆయా విషయాల్లో అభినందిస్తూనే, చురకలంటిస్తున్నారు. ఈ నేపథ్యంలో ఉండవల్లి దగ్గరకు తన భర్తను షర్మిల పంచారా.? దీని వెనుక ఆమె రాజకీయ వ్యూహమేంటి.? అన్న ప్రశ్న తలెత్తుతోంది.

మరోపక్క, ఉండవల్లి దగ్గరకు షర్మిల ద్వారా బ్రదర్ అనిల్‌ని పంపించింది స్వయానా వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి అన్న ప్రచారమూ జరుగుతోంది. ఉండవల్లి రాజకీయాల్లో తల పండిన నాయకుడు. విషయ పరిజ్ఞానం ఎక్కువ. మంచి మాటకారి కూడా.
అందుకే ఉండవల్లిని వైఎస్ జగన్ ప్రసన్నం చేసుకునేందుకు ప్రయత్నిస్తున్నారనీ, నేరుగా వెళ్ళకుండా బ్రదర్ అనిల్ కుమార్‌ని పంపారనీ అంటున్నారు.

బ్రదర్ అనిల్ కుమార్‌తో భేటీ అనంతరం ఉండవల్లి మాట్లాడుతూ, ‘ఆంధ్రప్రదేశ్, తెలంగాణ రాజకీయాలు.. వైఎస్సార్ కాంగ్రెస్ పార్టీ, వైఎస్సార్ తెలంగాణ పార్టీ.. సహా చాలా అంశాలు చర్చకు వచ్చాయి. ఉక్రెయిన్ అంశం గురించీ చర్చించుకున్నాం. అయితే, మీడియాకి చెప్పగలిగే విషయాలేమీ లేవు..’ అంటూ తనదైన స్టయిల్లో వ్యాఖ్యానించడం గమనార్హం.

‘ఇన్నాళ్ళకు వైఎస్సార్ కుటుంబం నుంచి నా దగ్గరకు రావడం సంతోషకరం..’ అని ఉండవల్లి సెటైరికల్ డైలాగులు పేల్చారు. మరోపక్క, రాజకీయాల గురించి తనకు తెలియదనీ, ఏసుక్రీస్తుని నమ్ముకున్న తాను ఆ దేవుడు చెప్పకుండా ఏమీ చేయనని, మామయ్య వైఎస్సార్ సన్నిహితుడు కావడంతోనే ఉండవల్లిని కలిశాననీ, పలు అంశాలపై ఆయన్ని అడిగి తెలుసుున్నాననీ అన్నారు బ్రదర్ అనిల్ కుమార్.