రండి.. కోవిడ్ వైరస్ అంటించుకోండి.! ఇదెక్కడి బాధ్యతారాహిత్యం.?

కోవిడ్ 19 కేసులు పెరుగుతున్నాయ్.. ఐదు వేలకు దిగువకు దేశంలో రోజువారీ కేసులు దిగివస్తున్న వేళ, అనూహ్యంగా కేసుల తీవ్రత పెరిగిపోయి.. లక్షన్నరకి చేరుకుంది. నాలుగైదు లక్షలకు రోజువారీ కేసులు చేరడానికి జస్ట్ కొన్ని రోజుల సమయం చాలు. ఇంత వేగంగా కోవిడ్ 19 విస్తరించడానికి కారణమేంటి.?

అధికారిక లెక్కల ప్రకారం ఒమిక్రాన్ వేరియంట్ కేసులు దేశవ్యాప్తంగా 3 వేల వరకు మాత్రమే కనిపిస్తున్నాయి. మరి, రోజువారీగా లక్షన్నర వరకు నమోదవుతున్న కేసులకు సంబంధించి ఏ వేరియంట్‌ని నిందించగలం.? దీన్ని డెల్టా వేరియంట్ అనగలమా.? అదే నిజమైతే, వ్యాక్సినేషన్ పనిచేసిందనా.? పనిచేయడంలేదనా.?

డిసెంబర్ నెలలో కోవిడ్ భయాలు షురూ అయ్యాయి. ఒమిక్రాన్ గురించిన ప్రచారం జరిగింది. ప్రభుత్వాలేం చెయ్యాలి.? ప్రజల్ని అప్రమత్తం చేయాలి. కట్టడి చర్యలకు ఉపక్రమించాలి. కానీ, క్రిస్‌మస్, న్యూ ఇయర్ వేడుకలకు సంబంధించి స్పెషల్ ఈవెంట్లకూ అనుమతులు ఇచ్చేశారు. ఇప్పుడు సంక్రాంతి హంగామా.. ఇక్కడా సంబరాలకు హద్దూ అదుపూ ఏమీ లేదు.

ప్రభుత్వాలు పట్టించుకోవడంలేదు కాబట్టి, ప్రజల్లోనూ విచ్చలవిడితనం పెరిగిపోయింది. మహేష్‌బాబుకి కరోనా సోకిందట.. ఇంకొకరికి కరోనా సోకిందట.. అని నిత్యం వార్తల్లో వింటున్నాం. చాలా జాగ్రత్తలు తీసుకునేవారికే తేలిగ్గా కోవిడ్ సోకుతున్నప్పుడు సామాన్యుడి పరిస్థితేంటి.?

‘ఒమిక్రాన్ వేరియంట్ పెద్దగా ప్రమాదకరం కాదు.. వ్యాక్సినేషన్ చాలామందికి జరిగిపోయింది కాబట్టి.. ఎవరూ భయపడాల్సిన పనిలేదు..’ అని ప్రభుత్వాలు చెబుతున్నమాటలు ప్రజలకు ఇంకోలా అర్థమవుతున్నాయి.. ప్రజల్లో అలసత్వాన్ని పెంచుతున్నాయి.

రారమ్మని కోవిడ్ వైరస్‌ని ఇంకోసారి గట్టిగానే ఆహ్వానించేశాం. ప్రభుత్వాలు చెప్పే లెక్కలకి పొంతన వుండదని.. దేశంలో సెకెండ్ వేవ్‌కి సంబంధించిన పాత లెక్కల్లో కొత్త మార్పులు (మరణాలకు సంబంధించి) చూస్తేనే అర్థమవుతుంది. ఎవడి ఛావు వాడు చావాల్సిందే కాబట్టి.. కోవిడ్ విషయంలో ప్రభుత్వాల్ని నిందించడం అనవసరం. ప్రభుత్వాల బాధ్యతారాహిత్యానికి ప్రజల బాధ్యతారాహిత్యం తోడైతే.. వినాశనమేనని ప్రతి ఒక్కరూ గుర్తుంచుకోవాలి.