బిగ్ క్వశ్చన్: ఆంధ్రప్రదేశ్ రాష్ట్రానికి రాజధాని ఏది.?

మళ్ళీ మళ్ళీ అదే ప్రశ్న. కానీ, రెండున్నరేళ్ళుగా సమాధానమే దొరకడంలేదు. ఆంధ్రప్రదేశ్ రాజధాని ఏదన్న ప్రశ్నకు సమాధానం చెప్పలేకపోతోంది వైఎస్ జగన్ ప్రభుత్వం. రాష్ట్రాన్ని నడుపుతోన్న ప్రభుత్వం, రాష్ట్ర రాజధాని ఏదన్న ప్రశ్నకు సమాధానం చెప్పుకోలేకపోతోందంటే, రాష్ట్రానికి ఇంతకన్నా అవమానం ఇంకేం కావాలి.?

మూడు రాజధానుల చట్టాన్ని వైఎస్ జగన్ సర్కార్ వెనక్కి తీసుకున్నంతమాత్రాన, ఏకైక రాజధాని అమరావతికి కట్టుబడి వున్నట్టు కాదు. ‘మెరుగైన బిల్లుని తీసుకొస్తాం..’ అంటూ ముఖ్యమంత్రి వైఎస్ జగన్ మోహన్ రెడ్డి చెప్పుకొచ్చారు. ‘ఈ ప్రాంతం మీద నాకు ఎలాంటి ద్వేషం లేదు. పైగా, ఇక్కడే నేను ఇల్లు కట్టుకున్నాను. ఈ ప్రాంతం మీద నాకు మమకారం ఎక్కువ..’ అని వైఎస్ జగన్ అసెంబ్లీ సాక్షిగా చెప్పిన విషయం విదితమే.

కానీ, అమరావతి మీద వైఎస్ జగన్ మోహన్ రెడ్డికి అంత మమకారమే వుండి వుంటే, అమరావతికి ఇప్పుడీ దుస్థితి వచ్చి వుండేది కాదు. రెండున్నరేళ్ళుగా అమరావతిలో కొత్తగా ఒక్క ఇటుక కూడా వచ్చి చేరలేదు.. రాజధాని పేరుతో. మరెలా అమరావతిపై వైఎస్ జగన్ మోహన్ రెడ్డికి మమకారం వుందని అనుకోగలం.?

మూడు రాజధానులు గల్లంతయ్యాయి అధికారికంగా. మరి, ఏకైక రాజధాని అమరావతి పరిస్థితేంటి.? ‘మూడు రాజధానుల చట్టాన్ని వెనక్కి తీసుకున్నంతమాత్రాన, అమరావతిని రాజధానిగా మేం గుర్తించబోం..’ అన్న భావన వైసీపీ శ్రేణుల్లో వ్యక్తమవుతోంది.

సాంకేతికంగా చూస్తే, వైఎస్ జగన్ సర్కార్ ఒప్పుకున్నా ఒప్పుకోకున్నా.. ఏకైక రాజధాని ప్రస్తుతానికి అమరావతి మాత్రమే. ఆ అమరావతి కేంద్రంగానే చట్టాలు జరుగుతున్నాయి. ఆ అమరావతి కేంద్రంగానే పరిపాలన సాగుతోంది.

ఓ వైపు అప్పులు రాష్ట్రాన్ని ముంచెత్తుతున్న వేళ, ఇంకా రాష్ట్రంలో అధికార పక్షం బేషజాలకు పోవాల్సిన పనిలేదు. రాజధాని అమరావతికి లక్ష కోట్లు అవసరం లేదుగానీ, లక్ష కోట్ల సాకు చూపి.. అమరావతిని ఇంకా పాతరేయాలని చూస్తే, అంతకన్నా హాస్యాస్పదం ఇంకోటుండదు.