అమరావతి ‘మహా పాదయాత్ర’పై దాడులు జరుగుతాయా.?

‘రాష్ట్ర ప్రభుత్వం మూడు రాజధానులకు నిర్ణయం తీసుకుంది. దీన్ని వ్యతిరేకిస్తూ అమరావతి పరిరక్షణ సమితి మహా పాదయాత్ర పేరుతో అలజడి సృష్టించడం తగదు. రాయలసీమలో ఈ యాత్ర పట్ల వ్యతిరేకత రావొచ్చు. దాడులు జరిగే అవకాశం వుంది..’ అంటూ సాక్షాత్తూ రాష్ట్ర పోలీసు శాఖ గతంలో స్పష్టం చేస్తూ, ‘న్యాయస్థానం నుంచి దేవస్థానం వరకు మహా పాదయాత్ర’ చేపట్టిన అమరావతి పరిరక్షణ సమితికి తేల్చి చెప్పింది.

అయితే, కోర్టు జోక్యంతో అమరావతి రైతుల పాదయాత్రకు గ్రీన్ సిగ్నల్ లభించింది. బహుశా ఆ వెంకటేశ్వరస్వామి కరుణించాడేమో.. అమరావతి రైతులు విజయం సాధించారు. వైఎస్ జగన్ సర్కార్, మూడు రాజధానుల నిర్ణయాన్ని అధికారికంగా వెనక్కి తీసుకుంది.

సో, రాయలసీమలో ఇప్పుడు అలజడికి అవకాశమే లేదు. కానీ, కొందరు ‘మేధావుల’ ముసుగులో అమరావతి పరిరక్షణ సమితి మహా పాదయాత్రపై దాడులకు సిద్ధమవుతున్నారు. ‘దాడులు జరుగుతాయ్..’ అంటూ హెచ్చరికలు చేసేస్తున్నారు. మరి, ఈ బెదిరింపులపై ఆంధ్రప్రదేశ్ పోలీసు శాఖ ఎలాంటి ముందస్తు చర్యలు చేపడుతుంది.? అన్నదే ఇక్కడ అసలు సిసలు ప్రశ్న.

ప్రజా స్వామ్యంలో హింసకు తావు లేదు. దాడులకు అస్సలు ఆస్కారం లేదు. ప్రజలెవరైనా తమ అభిప్రాయాల్ని స్వేచ్ఛగా వెల్లడించేందుకే భావ ప్రకటనా స్వేచ్ఛను రాజ్యాంగం కల్పించింది. ఆ హక్కుని కాలరాసే అసాంఘీక శక్తుల పీచమణచడం పోలీసు వ్యవస్థ విధి.

రాజధాని కోసం ఏ రాజకీయ నాయకుడైనా తమ సొంత భూముల్ని ఇచ్చాడా.? లేదే.! మరి, రైతులు తమ భూముల్ని రాజధాని కోసం, రాష్ట్రం కోసం ఇచ్చినప్పుడు, ఆ రైతులు న్యాయం కోసం పోరాడుతోంటే, వారి మీద దాడులు చేయడమేంటి నాన్సెన్స్ కాకపోతే.?

ఉత్తరాంధ్ర ప్రజల కోసం, రాయలసీమ ప్రజల కోసం.. మొత్తం 13 జిల్లాల ఆంధ్రప్రదేశ్ కోసం అమరావతి రైతులు తమ భూముల్ని ప్రభుత్వానికి అప్పగించారు.. రాజధాని నిర్మాణం నిమిత్తం. ఆ మాత్రం ఇంగితం లేకుండా దాడులకు తెగబడ్తామంటోన్నవాళ్ళని అసాంఘీక శక్తులని కాక మరేమనాలి.?