ప్రశ్నించిన పవన్‌.. ఎదురుదాడికి దిగిన జగన్‌ సర్కార్‌.!

ఆంధ్రప్రదేశ్‌ అభివృద్ధి వెనక్కి వెళ్ళిందా.? ముందుకు వెళుతోందా.? అన్న ప్రశ్నకు సమాధానం రాష్ట్ర ప్రభుత్వానికే బాగా తెలుసు. ఆర్థిక పరిస్థితి అత్యంత అధ్వాన్నంగా తయారైందని సాక్షాత్తూ మంత్రులే చెబుతున్నారు. ఆ దారుణ పరిస్థితి కారణం చంద్రబాబు పాలనేనంటూ బుకాయింపులకు దిగుతున్నా.. ఐదు నెలల్లో వైఎస్‌ జగన్‌ ప్రభుత్వం, రాష్ట్రాన్ని ఏం ఉద్ధరించింది.? అన్న ప్రశ్నకు మాత్రం అధికార పార్టీ నేతలు సమాధానం చెప్పలేకపోతున్నారు.

ఆంధ్రప్రదేశ్‌కి రాజధాని వుందా.? లేదా.? అని జనసేన అధినేత పవన్‌ కళ్యాణ్‌ ప్రశ్నిస్తే, ఆ ప్రశ్నకు సమాధానం చెప్పలేక అధికార పార్టీ నేతలు పడుతున్న పాట్లు అన్నీ ఇన్నీ కావు. రాష్ట్రంలో ఇసుక కొరత వుందని మంత్రులే ఒప్పుకుంటున్నారు. జనసేనాని ఆవేదన కూడా అదే కదా.!

ఇసుక కొరత కారణంగా భవన నిర్మాణ కార్మికులు రోడ్డున పడ్డారన్నది పవన్‌ కళ్యాణ్‌ ఆవేదన. నియోజకవర్గాల స్థాయిలో వైసీపీ నేతలు తమకు భవన నిర్మాణ కార్మికుల నుంచి దూసుకొస్తున్న ప్రశ్నలకు సమాధానం చెప్పలేక గింజుకుంటున్న వైనం.. నిత్యం పత్రికల్లో దర్శనమిస్తూనే వుంది. ఈ లెక్కన రాష్ట్ర అభివృద్ధి ముందుకు వెళ్ళినట్లా.? పాతాళానికి పడిపోతున్నట్లా.? రాష్ట్ర ప్రజల ఆత్మగౌరవానికి ప్రతీక అయిన రాజధాని విషయంలో మంత్రులు నిర్లక్ష్యపూరిత వ్యాఖ్యలు చేస్తున్నారు. అసహనంతో ఊగిపోతున్నారు.

అసలు రాజధాని ఎక్కడుంది.? అని మంత్రులు ప్రశ్నిస్తుండడం హాస్యాస్పదం కాక మరేమిటి.? రాజధాని అనేది లేకపోతే, రాష్ట్ర ప్రభుత్వం అసెంబ్లీ సమావేశాల్ని ఎక్కడ నిర్వహించింది.? సచివాలయం కేంద్రంగా పాలన చేస్తున్న ముఖ్యమంత్రి.. ఆ సచివాలయం ఎక్కడుందన్న ప్రశ్నకు ఏం సమాధానమిస్తారు.?

చంద్రబాబు ప్రభుత్వ ప్రతిపాదనలు నచ్చకపోతే, కొత్త ప్రతిపాదనలు చేయాలి రాజధాని విషయమై వైఎస్‌ జగన్‌ సర్కార్‌. అది మానేసి, మొత్తంగా రాజధాని ఇమేజ్‌ని డ్యామేజ్‌ చేయాలనుకుంటే.. ఆ నష్టం భరించాల్సింది రాష్ట్ర ప్రజలే. మంత్రి పేర్ని నాని సహా పలువురు వైసీపీ నేతలు పవన్‌ కళ్యాణ్‌పై చాలా ‘సిల్లీగా’ ఎదురుదాడికి దిగేస్తున్నారుగానీ, రాజధాని విషయమై ఎవరికైనా స్పష్టతనిచ్చేంత ధైర్యం వుందా.?