‘పది’ పంచాయితీ: లోకేష్ ‘జూమ్’లోకి చొరబడిన వైసీపీ.!

‘ఏం కక్కుర్తి ఇది.?’.. తెలుగుదేశం పార్టీ ప్రశ్న.! ‘మమ్మల్ని చూసి వణికిపోయిన పప్పు’.. వైసీపీ ఎదురుదాడి.!

టీడీపీ జాతీయ ప్రధాన కార్యదర్శి, మాజీ మంత్రి, ఎమ్మెల్సీ నారా లోకేష్, పదో తరగతి విద్యార్థులతో జూమ్ మీటింగ్ ఏర్పాటు చేశారు. ఇటీవల ఆంధ్రప్రదేశ్ రాష్ట్రంలో పదో తరగతి ఫలితాలు వెల్లడి కాగా, పదో తరగతి పరీక్షల నుంచీ నడిచిన రాజకీయం.. ఆ తర్వాత మరింత ముదిరి పాకాన పడి, ఫలితాలొచ్చాక.. ఇంకా రచ్చ కొనసాగుతూనే వుంది.

పదో తరగతి ఫలితాల్లో 2 లక్షల మంది విద్యార్థులు ఫెయిల్ అవడం, ఉత్తీర్ణతా శాతం గణనీయంగా పడిపోవడంపై వైఎస్ జగన్ సర్కారు,రాష్ట్ర ప్రజలకు సమాధానం చెప్పాల్సి వున్నా, ఇంకా బుకాయింపులతోనే సరిపెడుతోందన్నది విపక్షాల వాదన.

సరే, ‘కోవిడ్ సమస్య..’ అంటూ ప్రభుత్వం కుంటి సాకులు చెప్పడమే కాదు, విద్యార్థులిలా తక్కువ ఉత్తీర్ణత సాధించడానికి కారణం టీడీపీకి చెందిన నారాయణ, పదో తరగతి ప్రశ్నా పత్రాల్ని లీక్ చేయడమేనంటూ ఎదురుడికి దిగడం మరో ఆసక్తికరమైన అంశమిక్కడ.

రాష్ట్రం ఎందుకు ఇలా భ్రష్టుపట్టిపోయిందో చెప్పడానికి ఇదొక నిదర్శనం మాత్రమే. అంతర్వేది రధం ఎందుకు దగ్ధమైంది.? అంటే, విపక్షాల కుట్ర అన్నారు. విపక్షాలకు చెందిన ఒక్క నాయకుడ్నీ ఈ కేసులో బుక్ చేసి జైలుకు పంపలేకపోయింది వైసీపీ సర్కారు.

రాష్ట్రంలో మహిళలపై అఘాయిత్యాలకూ విపక్షాలే కారణమంటూ యాగీ చేయడం అలవాటైపోయింది. ఇలా చిత్ర విచిత్రమైన రాజకీయాలు చేసే వైసీపీ, నారా లోకేష్ జూమ్ మీటింగ్‌లోకి చొరబడటంలో వింతేముంది.? విద్యార్థుల్ని వెంటేసుకుని, నారా లోకేష్‌కి షాకిచ్చేద్దామని మాజీ మంత్రి, వైసీపీ ఎమ్మెల్యే కొడాలి నాని, టీడీపీ నుంచి వైసీపీలోకి దూకేసిన గన్నవరం ఎమ్మెల్యే వల్లభనేని వంశీ, టీడీపీ జూమ్ మీటింగులోకి దూసుకొచ్చారు.

‘దొంగ చాటుగా వస్తారా.? ఇదేం బుద్ధి.?’ అని నారా లోకేష్ నిలదీసేసరికి, ఆ ఇద్దరూ చల్లగా జారుకున్నారు. ఇదీ రాష్ట్రంలో నడుస్తున్న చిత్ర విచిత్రమైన రాజకీయ నాటకం. వైసీపీనే ఓ జూమ్ మీటింగ్ ఏర్పాటు చేసుకోవచ్చుకదా.. టీడీపీ జూమ్ మీటింగ్‌లోకి చొరబడాల్సినంత కక్కుర్తి ఏమొచ్చిందట.?