అమరావతి రగడ: వైసీపీ అమాయకత్వానికి జాలిపడాల్సిందే.!

ఆంధ్రప్రదేశ్ రాజధాని అమరావతి విషయంలో వైఎస్ జగన్ సర్కారు ఆలోచన ఏంటి.? అన్నదానిపై వైసీపీ శ్రేణులకైనా ఓ స్పష్టత వుందా.? లేదా.? రాష్ట్ర ప్రజలు ఈ విషయమై ఒకింత గందరగోళానికి గురవుతున్నారు. చంద్రబాబు హయాంలో అమరావతిని రాష్ట్ర రాజధానిగా ప్రకటించిన విషయం విదితమే. అది, చంద్రబాబు సొంత ప్రకటన కాదు, ఆంధ్రప్రదేశ్ అసెంబ్లీ సాక్షిగా జరిగిన తీర్మానం.

అన్ని ప్రధాన రాజకీయ పార్టీలూ కలిసి అసెంబ్లీలో కూర్చుని తీర్మానించుకున్న రాజధాని అంశమది. కానీ, ఇప్పుడు సీన్ మారింది.! అన్నట్టు, ఇప్పుడూ రాజధానిపై అసెంబ్లీలో తీర్మానం జరిగింది. కానీ, తీర్మానించుకున్నది వైసీపీ మాత్రమే. దాన్ని ఇతర రాజకీయ పార్టీలు వ్యతిరేకించాయ్. అన్ని రాజకీయ పార్టీలు మద్దతిచ్చిన అమారావతి ఓ వైపు, కేవలం వైసీపీ తీర్మానించుకున్న మూడు రాజధానులు ఇంకో వైపు.

నిజానికి, మూడు రాజధానుల విషయమై తాము తీర్మానించిన తీర్మానాన్ని తామే వెనక్కి తీసుకున్న చరిత్ర వైసీపీది. కొత్త తీర్మానం పెట్టకుండానే, మూడు రాజధానులంటూ ప్రజల్ని ఏమార్చుతోంది అధికార వైసీపీ. మంత్రి రోజా తాజాగా మూడు రాజధానుల విషయమై ఆసక్తికరమైన వ్యాఖ్యలు చేశారు. విజయదశమి సందర్భంగా దేవాలయాల్లో మూడు రాజధానుల కోసం పూజలు చేయాలట.

ఇంకో మంత్రి బొత్స సత్యనారాయణ, మూడు రాజధానులకు అనుకూలంగా ప్రజలు నినదించాలనీ, అమరావతి కోసం పట్టుబడుతున్న రైతుల్ని అడ్డుకోవాలనీ పిలుపునిస్తున్నారు. మరో మంత్రి దాడిశెట్టి రాజా అయితే అమరావతి రైతుల పాదయాత్రను అడ్డుకుని తీరతామంటూ హెచ్చరికలు జారీ చేస్తున్నారు.

ఒక్కరంటే ఒక్కరికి కూడా సోయ వున్నట్లు కనిపించడంలేదు.. అందుకే అమరావతిని ‘కమ్మరావతి’ అంటున్నారు, అదసలు రాజధానే కాదు, స్మశానం.. ఎడారి.. ముంపు ప్రాంతం.. అంటూ ఏవేవో విమర్శలు చేస్తున్నారు.

విజయదశమినాడే.. చంద్రబాబు హయాంలో అమరావతికి శంకుస్థాపన జరిగింది. దేశంలోని చాలా పుణ్యక్షేత్రాల నుంచి మట్టి, నీరు తీసుకొచ్చి.. పెద్ద పెద్ద హోమాలు నిర్వహించారు రాజధానికోసం. అలా ఏర్పడ్డ రాజధాని అమరావతి మీద రాజకీయం విషం చిమ్ముతోంది. అలాంటిది, మళ్ళీ మూడు రాజధానుల కోసం పూజలట.. అది కూడా అమరావతి మీద విషం చిమ్ముతున్నోళ్ళు చెబుతున్నారు పూజలు చేయాలని.

జనం వెర్రి వెంగళప్పల్లా కనిపిస్తున్నారా.? ఇదీ జనం నుంచి వస్తోన్న ప్రశ్న. అసలంటూ అధికార వైసీపీకి సోయ వుందా.? లేదా.? అని జనం నిలదీసే పరిస్థితి వచ్చేసింది.