మెగా రాజకీయం.! బులుగు, పచ్చ రంగులు బయటపడిపోయాయ్.!

‘గాడ్ ఫాదర్’ సినిమా రాజకీయ ప్రకంపనలకు కేంద్ర బిందువు అవుతోంది. ప్రధానంగా, ఆంధ్రప్రదేశ్‌లో రెండు ప్రధాన రాజకీయ పార్టీలు ఉలిక్కిపడుతున్నాయ్ ఈ సినిమా దెబ్బకి. ఏం, తెలంగాణ రాజకీయంలో ఎందుకు ఆ అలజడి లేదు.? అంటే, ఆంధ్రప్రదేశ్ రాజకీయాల్లో వున్నంత ఛండాలం, ప్రపంచ రాజకీయాల్లో ఎక్కడా చూడలేం.

మలయాళ సినిమా ‘లూసిఫర్’లో ప్రస్తుత రాజకీయాల గురించిన ప్రస్తావన చాలానే వుంటుంది. అదో కల్పిత కథ. కానీ, రాజకీయాల్లో కుట్రలు, కుతంత్రాల గురించి కాస్త లోతుగానే దర్శకుడు చర్చించినట్లు కనిపిస్తుంది. నిజానికి, చెయ్యాలనుకుంటే, ఇంకా చాలా చేసెయ్యొచ్చు.. కానీ, తన కథ వరకు మాత్రమే పరిమితమయ్యాడు దర్శకుడు పృధ్వీరాజ్ సుకుమారన్. ఆయన ఈ సినిమాలో నటించాడు కూడా.. అయితే, అది అతిథి పాత్ర మాత్రమే. మెయిన్ రోల్ పోషించింది మోహన్‌లాల్.

తెలుగులో చిరంజీవి హీరోగా ‘గాడ్ ఫాదర్’ తెరకెక్కింది. తెలుగు వెర్షన్ కోసం కొన్ని మార్పులు చేశారట. అవేంటన్నది రేపు సినిమా విడుదలైతే తెలుస్తుంది. కానీ, ‘గాడ్ ఫాదర్’ సినిమా అప్పుడే రాజకీయ ప్రకంపనలకు కేంద్ర బిందువుగా మారిపోయింది. ప్రధానంగా బులుగు పార్టీ, పచ్చ పార్టీ ఉలిక్కిపడుతున్నాయ్.

వెన్నుపోటు రాజకీయాలు, డ్రగ్స్ మాఫియా.. వంటివాటి గురించి ‘లూసిఫర్’ సినిమాలోని సన్నివేశాలు పచ్చ పార్టీనీ, బులుగు పార్టీనీ ఇబ్బంది పెట్టడం సహజమే. ముఖ్యమంత్రి పదవిలో వున్న మామని చంపిన అల్లుడి ఉదంతం, డ్రగ్స్ ద్వారా వచ్చే సొమ్ముని రాజకీయాల్లో చక్రం తిప్పాలనుకోవడం.. ఇవన్నీ ఎవరికో ఎక్కడో కాలిపోతున్నాయ్.

వీటికి తోడు, ‘అందులో వున్నదే చూపించాం.. ఎవరన్నా ఆ సినిమా చూసి భుజాలు తడుముకుంటే చేసేదేమీ లేదు..’ అని మెగాస్టార్ చిరంజీవి మీడియాతో మాట్లాడుతూ చెప్పడంతో.. ఒక్కసారిగా ఏపీలో బులుగు, పచ్చ శిబిరాల్లో భయాందోళనలు పెరిగిపోయాయి.

‘మెగాస్టార్ చిరంజీవి చాలా మంచోడు, కానీ.. పవన్ కళ్యాణ్ మంచోడు కాదు..’ అని వ్యాఖ్యానించిన సోకాల్డ్ బులుగు బ్యాచ్ అనూహ్యంగా ప్లేటు ఫిరాయించేసి, చిరంజీవిని ట్రోల్ చేయడం మొదలు పెట్టింది. పచ్చ బ్యాచ్ సంగతి సరే సరి.. మెగా క్యాంప్ మీద పడి ఏడవడం ఆ బ్యాచ్‌కి వెన్నతో పెట్టిన విద్య.

ఏంటీ, సినిమాకే.. అదీ రీమేక్ సినిమాకే ఇలా భయపడిపోతే ఎలా.?