రాజధానిగా విశాఖ.. రాయలసీమకి మేలా.? కీడా.?

ఆంధ్రప్రదేశ్‌ రాజధాని అమరావతితో పోల్చితే, రాయలసీమకి విశాఖపట్నం చాలా చాలా దూరం. విశాఖ కేంద్రంగా అడ్మినిస్ట్రేటివ్‌ క్యాపిటల్‌ని ముఖ్యమంత్రి వైఎస్‌ జగన్‌ మోహన్‌రెడ్డి ప్లాన్‌ చేస్తుండడంతో రాయలసీమ వాసుల్లో భిన్నాభిప్రాయాలు వ్యక్తమవుతున్నాయి. శ్రీబాగ్‌ ఒడంబడికని ఇన్నాళ్ళకు గౌరవిస్తున్నట్లుగా హైకోర్టును కర్నూలులో ఏర్పాటు చేసేందుకు వైఎస్‌ జగన్‌ ప్రభుత్వం పావులు కదుపుతోంది. కర్నూలులో హైకోర్టు పెడితే, రాయలసీమకు అదనంగా కలిగే లాభం ఏంటి.? అన్న చర్చ ఇప్పుడు రాయలసీమ వాసుల్లో వ్యక్తమవుతోంది.

హైకోర్టు కర్నూలులో పెట్టి, విశాఖలోనూ అమరావతిలోనూ బెంచ్‌లు ఏర్పాటు చేస్తే.. అదనపు వ్యయం తప్ప.. అదనపు ఉపయోగమేమీ వుండదు. పైగా, రాజధాని అమరావతిపై కొన్ని పరిమితులు విధించి.. పూర్తిస్థాయి రాజధాని హోదాని పరోక్షంగా విశాఖకు ఇవ్వడమంటే.. రాయలసీమ వాసులు చాలా పనుల కోసం విశాఖ వరకూ పరుగులు పెట్టాల్సిందే. విశాఖ – విజయవాడ మధ్య దూరం దాదాపు 400 కిలోమీటర్లు. విజయవాడ అభివృద్ధి చెందిన నగరమని ప్రత్యేకంగా చెప్పాల్సిన పనిలేదు. సో, అమరావతి ప్రాంతం, రాజధాని స్థాయిలో కాకపోయినా.. ఖచ్చితంగా అభివృద్ధి చెందుతుంది.. ఒకవేళ అక్కడి నుంచి రాజధానిని తరలించినాసరే.

ఎలా చూసినా, నష్టం రాయలసీమకే ఎక్కువ. రాయలసీమకు చెందిన ముఖ్యమంత్రి, మూడు రాజధానుల ప్రతిపాదనతో రాయలసీమకు నష్టం చేయడమేంటి.? అన్న ఆవేదన రాయసీమ వాసుల నుంచి ఇప్పుడిప్పుడే తెరపైకి వస్తోంది. ఈ నేపథ్యంలోనే ‘ఆధ్యాత్మిక రాజధానిగా తిరుపతి’ అనే వాదన బలం పుంజుకుంటోంది. అనంతపురంలోనూ సెగలు పెరుగుతున్నాయి.

ఆశ్చర్యకరమైన విషయమేంటంటే, శ్రీకాకుళం జిల్లాకు సైతం అభివృద్ధి పరంగా ప్రత్యేక వరాలు ప్రకటించాల్సిందేనన్న డిమాండ్లు వస్తుండడం. సందట్లో సడేమియా దోనకొండ చుట్టూ ప్రకాశం జిల్లా వాసులూ పోరు ఉధృతం చేసేందుకు సమాయత్తమవుతున్నారు. మొత్తంగా చూస్తే, 3 రాజధానుల పేరుతో రాష్ట్రమంతా వైఎస్‌ జగన్‌ సర్కార్‌ అలజడి సృష్టించినట్లే కన్పిస్తోంది.