ప్రత్యేక హోదా అడగడానికి ఏ ‘బానిసత్వం’ అడ్డొచ్చిందట.?

‘మేం అధికారంలోకి వస్తే, కేంద్రం మెడలు వంచి రాష్ట్రానికి ప్రత్యేక హోదా సాధిస్తాం..’ అని నినదించిన వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌ మోహన్‌ రెడ్డి, హోదా సంగతి మర్చిపోయి, కేంద్రానికి ఎప్పుడో మెడలు వంచేసుకున్నారు. అలా వైఎస్‌ జగన్‌ స్వయంగా మెడలు వంచేసుకున్నాక, ఆయనతోపాటు అక్రమాస్తుల కేసులో ‘ఏ2’గా వున్న వైసీపీ ముఖ్య నేత, రాజ్యసభ సభ్యుడు విజయసాయిరెడ్డి మాత్రం తలెత్తుకుని కేంద్రాన్ని ప్రత్యేక హోదాపై డిమాండ్‌ చేయగలరా.? ఇదీ ఆంధ్రప్రదేశ్‌ ప్రజానీకం సంధిస్తున్న ప్రశ్న.

రాష్ట్రానికి మూడు రాజధానులంటూ ఏపీ ముఖ్యమంత్రి వైఎస్‌ జగన్‌ అసెంబ్లీలో చేసిన వ్యాఖ్యలు పెను దుమారం రేపుతున్నాయి. దీనిపై విజయసాయిరెడ్డి ‘సిల్లీ’ వ్యాఖ్యలు చేశారు సోషల్‌ మీడియా వేదికగా. ‘రాజధాని మూడు చోట్ల వుంటే తప్పేమిటని ఆంధ్రప్రదేశ్‌ ముఖ్యమంత్రిగారు అలా అన్నారో లేదో యజమాని కంటే ముందే బానిస మొరుగుతున్నాడు. అమరావతికి దిక్కు లేదు, మూడు నగరాలెలా కడతారని అజ్ఞానాన్ని చాటుకున్నాడు. కర్నూలు, విశాఖ అభివృద్ధి చెందిన నగరాలు. అమరావతిని ఎటూ కాకుండా చేసిన పాపం చంద్రబాబుదే’ అని ట్వీటేశారు విజయసాయిరెడ్డి.

ఇక్కడ అజ్ఞానం ఎవరిదో సుస్పష్టమయిపోయింది. కర్నూలు, విశాఖ అభివృద్ధి చెందిన నగరాలు గనుక, వాటిని రాజధానులుగా ప్రకటించేస్తే.. ఆ ఘనత తమ ఖాతాలో వేసుకోవాలని వైసీపీ భావిస్తోందన్నమాట. ఇంతకన్నా అజ్ఞానం ఇంకేముంటుంది.? ఇక, ‘బానిసత్వం’ గురించి విజయసాయిరెడ్డి మాట్లాడితే, నలుగురూ నవ్విపోతారు.

కేంద్రాన్ని హోదాపై ప్రశ్నించలేని బానిసత్వం ఎవరిది.? రాజధాని అమరావతికి శంకుస్థాపన చేసిన ప్రధానిని ప్రశ్నించలేని బానిసత్వం ఎవరిది.? పోలవరం ప్రాజెక్టుకి కేంద్రం నిధులు ఆలస్యం చేస్తోంటే ప్రశ్నించలేని బానిసత్వం ఎవరిది.? వెనుకబడ్డ జిల్లాలకు ఇచ్చిన నిధుల్ని వెనక్కి తీసుకున్న కేంద్రాన్ని ప్రశ్నించలేని బానిసత్వం ఎవరిది.? సంధించుకుంటూ పోతే ఒకటి కాదు, వంద ప్రశ్నలు పుట్టుకొస్తాయ్‌.! ఇవన్నీ సగటు ఆంధ్రప్రదేశ్ పౌరులు సంధిస్తున్న ప్రశ్నలు.. వీటికి సమాధానం చెప్పేంత సీన్ విజయసాయిరెడ్డికి వుందా.?