అవయవాలను దానం చేసిన విజయ్ దేవరకొండ.. ప్రశంసలు కురిపిస్తున్న అభిమానులు!

టాలీవుడ్ రౌడీ స్టార్ విజయ్ దేవరకొండ నటించిన రీసెంట్ మూవీ ‘లైగర్’ బాక్సాఫీస్ వద్ద డిజాస్టర్‌గా మిగలడంతో ఆయన ప్రస్తుతం తన నెక్ట్స్ సినిమాలపై ఫోకస్ పెట్టాడు. దర్శకుడు శివ నిర్వాణ దర్శకత్వంలో ఖుషి అనే సినిమాలో నటిస్తున్న విజయ్ దేవరకొండ, తాజాగా మరోసారి వార్తల్లో నిలిచాడు. హైదరాబాద్‌లోని పేస్ ఆసుపత్రిలో నిర్వహించిన లీవర్ ట్రాన్స్‌ప్లాంటేషన్ అవగాహన కార్యక్రమానికి విజయ్ దేవరకొండ చీఫ్ గెస్ట్‌గా హాజరయ్యాడు.

ఈ సందర్భంగా పేస్ ఆసుపత్రితో తనకున్న అనుబంధాన్ని విజయ్ దేవరకొండ గుర్తుకు చేసుకున్నాడు. తాను ‘ఎవడే సుబ్రహ్మణ్యం’ సినిమాలో నటిస్తున్నప్పుడు తన తండ్రి తీవ్ర అనారోగ్యానికి గురయ్యారని.. ఆ సమయంలో పేస్ ఆసుపత్రి డాక్టర్లు ఎంతో కృషి చేసి తన తండ్రికి మంచి వైద్యాన్ని అందించారని.. వారి కారణంగానే ఇప్పుడు ఆయన ఆరోగ్యంగా ఉన్నారంటూ విజయ్ దేవరకొండ తెలిపారు. అవయవ దానం, దాని ప్రాముఖ్యత గురించి తనకు తెలుసని, అందుకే తన శరీరంలోని అన్ని అవయవాలను డొనేట్ చేస్తున్నట్లు ఆయన ప్రకటించాడు. తన అవయవాలు తన తరువాత ఇతరులకు ఉపయోగపడతాయంటే అంతకంటే సంతోషించే విషయం ఏముందని ఆయన ఈ సందర్భంగా అన్నాడు.

ఇలా విజయ్ దేవరకొండ తీసుకున్న నిర్ణయానికి నెటిజన్లు, ఆయన అభిమానులు హర్షం వ్యక్తం చేస్తున్నారు. తన ఆర్గాన్స్ ఇతరులకు ఉపయోగపడే విధంగా డొనేట్ చేస్తుండటం నిజంగా గొప్ప విషయమని, విజయ్ దేవరకొండ మున్ముందు ఇలాంటి మంచి పనులు ఇంకా చేయాలని వారు కోరుతున్నారు. ఏదేమైనా విజయ్ దేవరకొండ ప్రస్తుతం తీసుకున్న నిర్ణయంతో మరోసారి నెట్టింట టాక్ ఆఫ్ ది టౌన్‌గా మారిపోయాడు.