చిరంజీవి వెనుక ఆ ఇద్దరూ ఉన్నారా?

ఆంధ్రప్రదేశ్ కు మూడు రాజధానుల వ్యవహారం ఎంత సంచలనం సృష్టించిందో, దీనిపై మెగాస్టార్ చిరంజీవి చేసిన ప్రకటన సైతం అంతే సంచలనం రేపింది. తన సోదరుడు, జనసేన అధినేత పవన్ కల్యాణ్ విధానానికి విరుద్ధంగా, మూడు రాజధానులకు అనుకూలంగా చిరంజీవి ప్రకటన చేయడం జనసేనకు ఇబ్బందిగా పరిణమించింది.

దీంతో జన సైనికులు ఆ ప్రకటన ఫేక్ అంటూ చిరంజీవే ఖండన ప్రకటన విడుదల చేసినట్టుగా ఓ లేఖను వైరల్ చేశారు. దీంతో మళ్లీ చిరంజీవి రంగంలోకి దిగి తాను మొదట చేసిన ప్రకటనకే కట్టుబడి ఉన్నానని, తన పేరుతో వచ్చిన రెండో ప్రకటన ఫేక్ అంటూ మరో ప్రకటన విడుదల చేశారు. దీంతోపాటు వాయిస్ మెసేజ్ కూడా ఇచ్చారు. అయితే, ఇది కూడా మిమిక్రీ అంటూ పలువురు ఆరోపించారు.

వాస్తవానికి చాలా కాలంగా రాజకీయాలకు దూరంగా ఉంటున్న చిరంజీవి అకస్మాత్తుగా ఏపీ రాజధానుల వ్యవహారంపై ఎందుకు స్పందించారా అనే అంశంపై జోరుగా చర్చ సాగింది. ఆయన విశాఖలో స్టూడియో కట్టాలని భావిస్తున్నారని, అందుకే ప్రభుత్వాన్ని ప్రసన్నం చేసుకునేందుకు మూడు రాజధానులకు అనుకూలంగా ప్రకటన చేశారని ఆరోపణలు వచ్చాయి.

కానీ రాజధాని హోదాతో సంబంధం లేకుండా విశాఖపట్నం ఎప్పుడో అభివృద్ధి చెందింది. విజయవాడతో పోలిస్తే విశాఖ పెద్ద నగరం కావడమే కాకుండా అన్ని విధాలా అనుకూలమైన ప్రదేశమే. ఈ నేపథ్యంలో రాజధాని అయితేనే చిరంజీవి అక్కడ స్టూడియో కడతారని భావించడం సరికాదని అంటున్నారు.

చిరంజీవి ఆ ప్రకటన చేయడానికి ముఖ్యం కారణం ఆయనకు సన్నిహితంగా ఉండే ఇద్దరు వ్యక్తులని సమాచారం. వారిలో ఒకరు మాజీ మంత్రి, టీడీపీ నేత గంటా శ్రీనివాసరావు కాగా, మరొకరు మంత్రి కన్నబాబు. వీరిద్దరే చిరంజీవిని ఒప్పించి రాజధానికి అనుకూలంగా ప్రకటన చేయించారని రాజకీయ వర్గాల్లో గుసగుసలు వినిపిస్తున్నాయి.

వైఎస్సార్ సీపీలోకి రావాలని భావిస్తున్న గంటా శ్రీనివాసరావు తన పట్టు నిరూపించుకుని జగన్ వద్ద మంచి మార్కులు కొట్టేయడానికి చిరంజీవితో ఈ ప్రకటన చేయించారని అంటున్నారు. అదే సమయంలో కన్నబాబు సైతం పార్టీలో తన పట్టు నిలబెట్టుకోవడానికి ఈ విషయంలో చిరంజీవితో సంప్రదింపులు జరిపారని చెబుతున్నారు. మొత్తానికి వీరిద్దరి సూచనలతోనే చిరంజీవి తన తమ్ముడితో విభేదించి మరీ రాజధానికి అనుకూలంగా ప్రకటన చేశారని తెలుస్తోంది.