పవన్ కళ్యాణ్ ఇంటి ముందు రెక్కీ జరగలేదట.! ఇదేం సిత్రం చెప్మా.?

జనసేన అధినేత పవన్ కళ్యాణ్ హత్యకు కుట్ర జరుగుతోదంటూ జనసేన పార్టీ తీవ్ర ఆందోళన వ్యక్తం చేస్తోన్న సంగతి తెలిసిందే. అధినేత భద్రత కోసం అవసరమైతే తాము ఆయనకు రక్షణగా నిలుస్తామని జనసైనికులు అంటున్నారు. హైద్రాబాద్‌లోని పవన్ కళ్యాణ్ ఇంటి ముందర ఇటీవల కొందరు వ్యక్తులు నిఘా పెట్టడం, పవన్ కళ్యాణ్ సెక్యూరిటీ సిబ్బందితో గొడవ పడటం, పవన్ కళ్యాణ్ మీదా ఆయన కుటుంబ సభ్యుల మీదా బూతులు తిట్టడం.. తెలిసిన విషయాలే.

ఈ మేరకు జనసేన పార్టీ తెలంగాణ విభాగం, హైద్రాబాద్‌లోని జూబ్లీహిల్స్ పోలీసులకు ఫిర్యాదు కూడా చేసింది. సీసీటీవీ ఫుటేజ్‌తోపాటు, అక్కడ అనుమానాస్పదంగా సంచరించిన వాహనాల వివరాల్నీ పోలీసులకు అందజేశారు జనసేన నాయకులు. జనసేన పార్టీ ఫిర్యాదుతో రంగంలోకి దిగిన పోలీసులు, సీసీటీవీ ఫుటేజ్ ఆధారంగా నిందితుల్ని గుర్తించి, వారిని విచారించారట.

అయితే, రెక్కీ లాంటిదేమీ జరగలేదనీ, తప్పతాగి యువకులు చిందులేశారనీ, ఈ క్రమంలోనే వారు సెక్యూరిటీ సిబ్బందితో గొడవ పడ్డారనీ పోలీసులు తేల్చారట. పబ్బులో మద్యం సేవించి, అర్థరాత్రి తిరిగొస్తుండగా ఈ ఘటన జరిగిందన్నది పోలీసులు చెబుతున్న విషయం. మద్యం మత్తులో గొడవ పడినట్లు నిందితులు ఒప్పుకున్నారట కూడా. వారికి నోటీసులు ఇచ్చామని పోలీసులు చెబుతున్నారు.

మరి, పవన్ కళ్యాణ్ వెంట అనుమానాస్పద రీతిలో అనుసరిస్తున్నవారి సంగతేంటి.? ఈ విషయమై స్పష్టత రావాల్సి వుంది. జనసేనాని హత్యకు కుట్ర జరుగుతోందన్న తమ అనుమానంలో ఎలాంటి మార్పూ లేదని జనసేన పార్టీ అంటోంది. కేసు నీరుగార్చే ప్రయత్నాలు జరుగుతున్నట్లు జనసేన నేతలు అనుమానం వ్యక్తం చేస్తున్నారు.

విశాఖ పర్యటన సందర్భంగా పోలీస్ ఉన్నతాధికారి పవన్ కళ్యాణ్‌ని బెదిరించేలా వ్యవహరించడం, జనసేన నేతలపై హత్యాయత్నం కేసులు నమోదు చేయడం, వారిని అరెస్టు చేసి తీవ్రంగా కొట్టడం, తిట్టడం.. వీటన్నటినీ జనసేన పార్టీ సీరియస్‌గా పరిగణిస్తోంది. విశాఖలోనే జనసేనాని హత్యకు ప్లాన్ చేశారని జనసేన నేతలు ఆరోపిస్తున్న విషయం విదితమే.