ఇన్‌సైడ్‌ స్టోరీ: టీడీపీ పూర్తిగా ఆశలొదిలేసుకున్నట్లే.!

తెలుగుదేశం పార్టీకి ఏమయ్యింది.? తెలంగాణపై ఆశలు వదిలేసుకున్నట్లే, ఆంధ్రప్రదేశ్‌ విషయంలోనూ తెలుగుదేశం పార్టీలో నిస్తేజం అలముకుందా.? పార్టీకి నేతలు ఒకరొకరుగా దూరమవుతోంటే.. డ్యామేజీ కంట్రోల్‌ చర్యలకు పార్టీ అధినేత నారా చంద్రబాబునాయుడు ఎందుకు వ్యూహరచన చేయలేకపోతున్నారు.? రానున్న రోజుల్లో ఆంధ్రప్రదేశ్‌లో తెలుగుదేశం పార్టీ మరిన్ని షాక్‌లు తినబోతోందా.? ఈ ప్రశ్నలిప్పుడు తెలుగు తమ్ముళ్ళకి కంటి మీద కునుకు లేకుండా చేస్తున్నాయి.

టీడీపీ నుంచి కొందరు ముఖ్య నేతలు వేరే పార్టీల్లోకి వెళ్ళిపోయారు.. కొందరేమో పలు కేసుల్లో చిక్కుకుపోయి నానా తంటాలూ పడుతున్నారు.. మిగిలినోళ్ళలోనూ చాలామంది వేరే పార్టీల్లోకి వెళ్ళేందుకు ‘సరైన సమయం’ కోసం ఎదురుచూస్తున్నారు. తెలుగుదేశం పార్టీ గతంలో ఎన్నడూ చూడని సంక్షోభమిది. అన్నట్టు, తెలుగుదేశం పార్టీకి ‘ఆగస్ట్‌ సంక్షోభం’ అనే ఓ సెంటిమెంట్‌ వుండనే వుంది. ఆ లెక్క, ఈ ఆగస్టులో తెలుగుదేశం పార్టీ మరింత దారుణమైన పరిస్థితిని ఎదుర్కొనబోతోందంటూ రాజకీయ వర్గాల్లో చర్చ జరుగుతోంది.

ఈ నెలలోనే మాజీ మంత్రి, టీడీపీ ఎమ్మెల్యే గంటా శ్రీనివాసరావు టీడీపీని వీడి వైసీపీలో చేరబోతున్నారట. మరో నలుగురైదుగురు ఎమ్మెల్యేలూ ఇదే బాటలో పయనించబోతున్నారంటూ మీడియా వర్గాల్లో గుసగుసలు విన్పిస్తున్నాయి. కరోనా నేపథ్యంలో టీడీపీ నేతలు బయటకొచ్చేందుకు ఇబ్బంది పడుతున్న మాట వాస్తవం. అయితే, కరోనాతోపాటు ఇతరత్రా కారణాలతోనూ టీడీపీ నేతలు ‘సైలెంట్‌’ అయిపోవడానికి కారణమన్న చర్చ జరుగుతోంది.

తన సోదరుడు జేసీ ప్రభాకర్‌ రెడ్డి అరెస్టు విషయంలో మొదట్లో రంకెలు వేసిన మాజీ మంత్రి జేసీ దివాకర్‌ రెడ్డి ఇప్పుడు పూర్తిగా సైలెంటయిపోయారు. అచ్చెన్నాయుడు విషయంలో ‘కింజరాపు’ కుటుంబానిదీ ఇదే పరిస్థితి. కొల్లు రవీంద్ర విషయంలోనూ టీడీపీ నేతలు పూర్తిగా లైట్‌ తీసుకున్నారన్న వాదనలు లేకపోలేదు. ‘ఎప్పుడు ఎవరి అరెస్ట్‌ గురించి వినాల్సి వస్తుందో.!’ అన్న భయం టీడీపీ నేతల్లో పెరిగిపోతున్న దరిమిలా, రాజకీయంగా తమను తాము కాపాడుకునేందుకు టీడీపీని వీడటం తప్ప చాలామంది తెలుగు తమ్ముళ్ళకు ఇంకో దారి కన్పించడంలేదు.

2024 వరకూ కాదు.. ఈలోగానే, అందునా ఈ ఏడాది లోనే తెలుగుదేశం పార్టీ ఆంధ్రప్రదేశ్‌లో దాదాపు ఖతం అయిపోతుందని వైసీపీ వర్గాలు జోస్యం చెబుతుండడం గమనార్హం.