బాబు కూడా అన్ ఫిట్టేనా యనమలా?

‘ఎన్నికల సంఘం అనేది స్వతంత్ర ప్రతిపత్తి కలిగిన రాజ్యాంగ వ్యవస్థ. అలాంటి సంస్థ కరోనా నేపథ్యంలో తనకున్న అధికారాలకు లోబడి స్థానిక ఎన్నికలను ఆరు వారాలు వాయిదా వేసింది. దీనిని ప్రశ్నించడానికి ముఖ్యమంత్రికి ఏం అధికారం ఉందో జగన్ చెప్పాలి. రాజ్యాంగబద్ధ సంస్థలను అవమానించాలా మాట్లాడిన జగన్.. సీఎంగానే కాదు రాజకీయ నాయకుడిగా కూడా అన్ ఫిట్’ – ఇవీ టీడీపీ నేత యనమల రామకృష్ణుడు మీడియాతో మాట్లాడుతూ చేసిన వ్యాఖ్యలు.

ఏపీలో స్థానిక సంస్థల ఎన్నికలపై ఈసీ వర్సెస్ సర్కారు యుద్ధం జరుగుతున్న తరుణంలో యనమల మీడియా ముందుకొచ్చి బోలెడు విషయాలు వల్లెవేశారు. ఎన్నికల సంఘం అధికారాలు, దాని విశిష్టత, రాజ్యాంగంలోని సెక్షన్లు చెబుతూ అది చాలా అత్యున్నత సంస్థ అని పేర్కొన్నారు. ఇంతవరకు బాగానే ఉంది.. మరి మొన్నటి ఎన్నికల్లో పోలింగ్ కు సరిగ్గా ఒక్కరోజు ముందు టీడీపీ అధినేత చంద్రబాబు అనుసరించిన వైఖరి మాటేమిటి అనే ప్రశ్న ఉత్పన్నమవుతోంది. గతేడాది ఏప్రిల్ 10న రాష్ట్ర ఎన్నికల ప్రధానాధికారి గోపాలకృష్ణ ద్వివేదీ వద్దకు చంద్రబాబు వెళ్లి సృష్టించిన హంగామా మరచిపోయారా యనమలా అని ప్రశ్నిస్తున్నారు.

అప్పుడు ముఖ్యమంత్రిగా ఉన్న బాబు.. ద్వివేదీని బెదిరించినప్పుడు ఈసీ ఓ అత్యున్నత సంస్థ అన్న విషయం గుర్తులేదా అని నిలదీస్తున్నారు. మీ సంగతేంటో చూస్తా.. నేను టేకప్ చేశానంటే అంత ఈజీగా వదిలిపెట్టను అంటూ ద్వివేదీపై అప్పడు బాబు ఒక రేంజ్ లో ఫైర్ అయ్యారు. అప్పుడు ఏ అధికారంలో బాబు ఆయనపై ఫైర్ అయ్యారో కూడా యనమల చెప్పి ఉంటే బాగుండేది.

ప్రస్తుతం ఎస్ఈసీ రమేశ్ కుమార్ నిర్ణయాన్ని జగన్ ప్రశ్నించడం తప్పు అని, ఆయన సీఎంగా పనికిరాడని పేర్కొన్న యనమల.. అప్పుడు ద్వివేదీని ప్రశ్నించిన బాబు కూడా సీఎంగా పనికిరాడని అంగీకరించినట్టేనా అనే సందేహాలు వెల్లువెత్తుతున్నాయి. యనమలా దీనికి సమాధానం చెప్పినా చెప్పకున్నా.. ప్రజలు మాత్రం బాబు సీఎంగా అన్ ఫిట్ అని డిసైడ్ చేసి నాటి ఎన్నికల్లో తీర్పు వెలువరించారని పలువురు సెటైర్లు వేస్తున్నారు.

ఇక జగన్ పది నెలల తర్వాత ప్రెస్ మీట్ పెట్టి, కొన్ని ఛానళ్లను లోనికి రాలేదని యనమల విమర్శించారు. ఇలా చేయడం తప్పని సెలవిచ్చారు. మరి టీడీపీ అధికారంలో ఉన్నప్పుడు జగన్ మీడియా ‘సాక్షి’ని బహిష్కరించిన సంగతిని యనమల మరిచిపోయారా అని వైసీపీ నేతలు ప్రశ్నిస్తున్నారు. ముందు వీటికి సమాధానం చెప్పిన తర్వాతే తమపై విమర్శలు చేయాలని సూచిస్తున్నారు.