సంక్రాంతి పండగ ‘మామూళ్ళు’.. బులుగు కేటుగాళ్ళు.!

తూర్పుగోదావరి జిల్లాలో ఇసుక లారీల డ్రైవర్లు, నదీ తీరంలోనే తమ వాహనాల్ని వదిలేసి ఆందోళనలు చేశారు. ఏంటి కారణం.? అని మీడియా ప్రశ్నిస్తే, ‘లారీకి 500 నుంచి 600’ వరకు ‘ఆమ్యామ్యా’ ఇచ్చుకోవాల్సిందిగా స్థానిక వైసీపీ నేతలు దందా షురూ చేశారట. లారీ ఓనర్లు ఈ విషయమై గుస్సా అవుతున్నారు.. సంబంధిత సంఘాల నేతలు అధికార పార్టీ తీరుపట్ల తీవ్ర అసహనం వ్యక్తం చేస్తూ, లారీల్ని ఎక్కడికక్కడ వదిలేయమని లారీ డ్రైవర్లకు చెప్పారట.

ఇది జస్ట్ ఓ శాంపిల్ మాత్రమే. ఇంకో చోట.. ప్రాంతమెక్కడో తెలియదుగానీ, ఏకంగా రేషన్ వాహనాల్లోనే ‘మామూళ్ళ’ డబ్బాలు పెట్టేశారు. అంటే, హుండీ తరహాలో అన్నమాట. ఈ హుండీల్లో జనాలు అధికార పార్టీకి మామూళ్ళు చెల్లించుకోవాలి. ఎక్కడికక్కడ స్థానిక వైసీపీ నేతలు, తమ పార్టీ రంగుల్ని జనం ఎక్కడ మర్చిపోతారోనని ఆ మామూళ్ళ హుండీలకు వైసీపీ రంగులు కూడా వేసేశారు.

‘అబ్బే, ఇదంతా గిట్టనవారు చేస్తోన్న దుష్ప్రచారం..’ అని అధికార వైసీపీ ఖండించొచ్చుగాక. ఇసుక లారీల వ్యవహారానికి సంబంధించి వీడియో పుటేజీలున్నాయి.. తెలుగు మీడియాలో అవి చక్కర్లు కొడుతున్నాయి. సోషల్ మీడియాలోనూ కుప్పలు తెప్పలుగా ఇలాంటి వీడియోలు కనిపిస్తున్నాయి.

ఇక, రేషన్ వాహనాల్లో పొందుపరిచిన వైసీపీ మామూళ్ళ హుండీల సంగతంటారా.? దీని గురించి ఎంత చెప్పుకున్నా తక్కువే. అన్ని చోట్లా అని కాదుగానీ, చాలాచోట్ల వృద్ధాప్య ఫించన్ల దగ్గరా అధికార వైసీపీ నేతల చిలక్కొట్టుడు వ్యవహారాలు నడుస్తున్నాయి. వాలంటీర్లపైనా ఆరోపణలున్నాయి.

‘మా ప్రభుత్వం రూపాయి కూడా అవినీతికి ఆస్కారం లేకుండా పని చేసేస్తోంది..’ అని వైసీపీ అధినాయకత్వం చెప్పుకుంటోంది. కానీ, కింది స్థాయి పరిస్థితులు అత్యంత దారుణంగా వున్నాయి. గడచిన రెండున్నరేళ్ళలో వైసీపీ నేతలు చాలా చోట్ల ఆర్థికంగా అనూహ్యంగా ఎదిగిన వైనమే ఇందుకు నిదర్శనం.

ఏదిఏమైనా, సంక్రాంతి పండగ పేరు చెప్పి హుండీలు పెట్టి మరీ మామూళ్ళను దండుకోవడం అంటే అంతకన్నా రాజకీయాల్లో దిగజారుడుతనం ఇంకేముంటుంది.?