కుటుంబం ఆత్మహత్య కేసులో ఎమ్మెల్యే కుమారుడు అరెస్టు

పాల్వంచలో రామకృష్ణ కుటుంబం ఆత్మహత్య ఘటన సంచలనం రేపిన సంగతి తెలిసిందే. ఈకేసులో ఆరోపణలు ఎదుర్కొంటున్న ఎమ్మెల్యే వనమా వెంకటేశ్వరరావు కుమారుడు వనమా రాఘవేంద్రరావును పోలీసులు హైదరాబాద్ లో అరెస్టు చేశారు. బాధితుడు రామకృష్ణ ఆత్మహత్యకు ముందు తీసుకున్న సెల్ఫీ వీడియో కలకలం రేపిన సంగతి తెలిసిందే. దీనిపై ఎమ్మెల్యే వనమా వెంకటేశ్వర రావు స్పందిస్తూ.. తనను ఈ ఘటన తీవ్ర మానసిక క్షోభకు గురి చేసిందని ప్రజలకు లేఖ రాశారు.

తన కుమారుడిపై ఆరోపణలు వస్తున్న నేపథ్యంలో పోలీసు విచారణకు పూర్తిగా సహకరిస్తానని అన్నారు. ఎమ్మెల్యే స్పందించిన గంటల వ్యవధిలోనే పోలీసులు రాఘవేంద్రను అరెస్టు చేశారు. రాఘవేంద్రను పోలీసులు కొత్తగూడెం తరలించారు. ఆయనపై 302, 306, 307 సెక్షన్ల కింద కేసులు నమోదు చేశారు. రామకృష్ణ ఆత్మహత్య నేపథ్యంలో రాఘవేంద్రపై గతంలో ఉన్న కేసులు వెలుగులోకి వస్తున్నాయి. రాఘవేంద్ర చుట్టూ అనేక వివాదాలు కారణంగా పాల్వంచ పట్టణ, గ్రామీణ పోలీసు స్టేషన్లలో 6 కేసులు నమోదయ్యాయి.