Renu Desai: ఆంద్రప్రదేశ్ లో ఇటీవల జరిగిన రాజకీయ పరిణామాలపై జనసేన అధినేత, పవర్ స్టార్ పవన్ కళ్యాణ్( Pavan Kalyan)మాజీ భార్య రేణు దేశాయ్( Renu Desai) కీలక వ్యాఖ్యలు చేశారు. తన మద్దతు పవన్ కళ్యాణ్ కి ఇస్తున్నట్లు వెల్లడించారు. పవన్ నిజాయితీగల వ్యక్తని, ఆయనకి డబ్బు పై వ్యామోహం లేదని తెలిపారు. ఇటీవల ఆయన నటించిన ‘బ్రో’ సినిమాలోని శ్యాంబాబు పాత్ర తనని ఉద్దేశించి పెట్టారని ఏపీ మంత్రి అంబటి రాంబాబు విమర్శలు చేసిన విషయం తెలిసిందే. ఈ క్రమంలో పవన్ కళ్యాణ్ వ్యక్తిగత విషయాలపై వెబ్ సిరీస్, సినిమా తీయనున్నట్లు మంత్రి తెలిపారు. ఈ పరిణామాలపై స్పందించిన రేణు సోషల్ మీడియా వేదికగా ఓ వీడియోని పోస్ట్ చేశారు.
‘ పవన్ కళ్యాణ్ వ్యక్తిగత విషయాలపై సినిమాలు వెబ్ సిరీస్ లు తీస్తామని కొందరు అంటున్నట్టు నా దృష్టికి వచ్చింది. రాజకీయాలు వేరు. సినిమాలు వేరు. ఇలాంటి వివాదాల్లోకి పిల్లల్ని లాగకండి. నా పిల్లల్ని మాత్రమే కాదు.. ఎవరి పిల్లల్ని వివాదాల్లోకి తీసుకురాకూడదు. పవన్ కళ్యాణ్ విషయానికొస్తే మా ఇద్దరి గురించి పక్కన పెడితే వ్యక్తిగతంగా నాకు ఆయనపై మంచి అభిప్రాయం ఉంది. ఆయన చాలా మంచి వ్యక్తి. సొసైటీ కోసం పనిచేయాలనే తత్వం కలిగిన మనిషి. పేదల సంక్షేమం కోసం పరితపించే మనిషి. ఆయనకి డబ్బు మీద వ్యామోహం లేదు. ప్రజలకి ఏదో చేయాలన్న తపనని మాత్రమే నేను గమనించాను. నిజానికి అలాంటి వ్యక్తి సొసైటీకి చాలా అవసరం. కాబట్టి నాతో పాటు మీ అందరి మద్దతు ఆయనకి లభిస్తుందని ఆశిస్తున్నాను’ అని రేణు అన్నారు.