ఆస్ట్రేలియా పార్లమెంటులో అత్యాచారం

మహిళల రక్షణ సహా పలు అంశాలపై చట్టాలు చేసే పార్లమెంటులోనే ఓ అతివపై అత్యాచారం జరిగింది. ఆస్ట్రేలియా పార్లమెంటులో తోటి ఉద్యోగినిపై ఆమె సహోద్యోగి అత్యాచారం చేసిన ఘటన ఆలస్యంగా వెలుగు చూసింది. రెండేళ్ల క్రితం జరిగిన ఈ సంఘటన గురించి బాధిత మహిళ తాజాగా వెల్లడించడంతో కలకలం రేగింది. 2019 మార్చిలో పార్లమెంటులోని రక్షణమంత్రి లిండా రెనాల్డ్ కార్యాలయంలో తనపై అత్యాచారం జరిగినట్టు బాధితురాలు వెల్లడించారు. నాటి ఘటన గురించి ఆ ఏడాది ఏప్రిల్ లోనే పోలీసులకు చెప్పానని.. కానీ తన కెరీర్ దెబ్బతీస్తారనే భయంతో అధికారికంగా ఫిర్యాదు చేయలేదని తెలిపారు.

రెనాల్డ్ కార్యాలయంలో పనిచేసే సిబ్బంది ఒకరు సమావేశం ఉందని పిలిచి తనపై అఘాయిత్యానికి పాల్పడినట్టు ఆరోపించారు. ఈ విషయం తెలియగానే ఆస్ట్రేలియా ప్రధాని స్కాట్ మారిసన్ తీవ్రంగా స్పందించారు. తొలుత బాధిత మహిళకు క్షమాపణలు చెప్పారు. ఆ ఘటనలపై విచారణ జరిపి బాధ్యులపై కఠిన చర్యలు తీసుకుంటామని స్పష్టంచేశారు. అత్యాచారం గురించి పోలీసులకు చెప్పిన విషయం వాస్తవమేనని రక్షణ మంత్రి రెనాల్డ్ పేర్కొన్నారు.