రాముడికి మరోసారి పట్టం.. అయోధ్యలో భూమిపూజ పూర్తి

కోట్లాది మంది హిందువుల చిరకాల వాంఛ అయిన అయోధ్య రామమందిరం కల సాకారమవుతోంది. శతాబ్దానికి పైగా వివాదాలమయంగా నడిచిన రాముడి గుడి వ్యవహారం గతేడాది సుప్రీంకోర్టు తీర్పుతో పరిష్కారమైంది. అందరికీ ఆమోదయోగ్యమైన రీతిలో దేశ అత్యున్నత న్యాయస్థానం వెలువరించిన తీర్పుతో అయోధ్యలో శ్రీరామ మందిర నిర్మాణానికి మార్గం సుగమమైంది. ఈ నేపథ్యంలో సరయూ నదీతీరంలో అయోధ్య రాముడు మరోసారి కొలువు తీరబోతున్నాడు. మందిర నిర్మాణానికి సంబంధించి ప్రధాని మోదీ బుధవారం మధ్యాహ్నం 12.44 గంటలకు భూమి పూజ చేశారు.

అంతకుముందు ఢిల్లీ నుంచి అయోధ్య చేరుకున్న మోదీకి యూపీ సీఎం యోగి ఆదిత్యనాథ్ స్వాగతం పలికారు. అక్కడి నుంచి హనుమాన్ గడీ ఆలయానికి వెళ్లి పూజలు చేశారు. అనంతరం ఓ పారిజాత మొక్కను నాటారు. తర్వాత రామ మందిర భూమి పూజలో పాల్గొన్నారు. 69 ఎకరాల్లో మూడు అంతస్తులతో 5 గోపురాలతో 161 అడుగుల ఎత్తులో నిర్మితం కానున్న ఈ ఆలయం.. ప్రపంచంలోనే మూడో అతిపెద్దది కావడం విశేషం.

అంకూర్ కోట్ లోని దేవాలయం తొలి స్థానంలో ఉండగా, తమిళనాడు తిరుచరాపల్లి శ్రీరంగనాథ ఆలయం రెండో స్థానంలో ఉంది. ఇక అయోధ్య రామ మందిరాన్ని తిరుగులేని నాణ్యతతో నిర్మించనున్నారు. వెయ్యేళ్లపాటు చెక్కుచెదరకుండా నిర్మాణం ఉండేలా దాదాపు రూ.300 కోట్ల వ్యయంతో నిర్మాణం చేపట్టనున్నారు. విపత్తులు తట్టుకునేలా ఉండేందుకు ఏకంగా 200 అడుగుల లోతు వరకు మట్టి పరీక్షలు కూడా నిర్వహించారు.

ఒకేసారి 10వేల మంది దర్శించుకునేలా నిర్మాణం చేస్తున్నారు. వాస్తు, శిల్పా శాస్త్రాల ఆధారంగా నమూనా రూపొందించారు. ఇక బాబ్రీ మసీదు నిర్మాణానికి దశాబ్దాలుగా పోరాడిన ఇక్బాల్ అన్సారీకి భూమిపూజకు సంబంధించిన తొలి ఆహ్వానాన్ని అందజేయగా.. రాముడి మాతృమూర్తి కౌసల్య జన్మించిన ఛత్తీస్ గఢ్ లోని చుందుర్ఖి నుంచి మరో ముస్లిం భక్తుడు మట్టిని తీసుకురావడం మరో విశేషం.