ఎన్టీయార్, చంద్రబాబు.. ఓ వెన్నుపోటు.! అసలేం జరిగింది.?

ప్రముఖ రాజకీయ విశ్లేషకుడు, సీనియర్ జర్నలిస్ట్… విక్రమ్ పూల, అప్పటి ‘వెన్నుపోటు’ వ్యవహారంపై ఆసక్తికరమైన విశ్లేషణ చేశారు. ఆనాటి వైస్రాయ్ ఘటన (స్వర్గీయ ఎన్టీయార్ మీద చెప్పులతో దాడి) వ్యవహారానికి సంబంధించి ప్రత్యక్ష సాక్షిగా తన అనుభవాల్ని ఓ ఇంటర్వ్యూలో పంచుకున్నారాయన.

తెలుగుదేశం పార్టీలో ఆనాటి పరిస్థితుల గురించి విక్రమ్ పూల చేసిన విశ్లేషణ ఆద్యంతం ఆసక్తికరంగా సాగింది. అసలు స్వర్గీయ ఎన్టీయార్ జీవితంలోకి లక్ష్మీపార్వతి వచ్చాక తెలుగుదేశం పార్టీలో చోటు చేసుకున్న పరిణామాల్ని విశ్లేషించకుండా, పిల్లనిచ్చిన మామని చంద్రబాబు ‘వెన్నుపోటు’ పొడిచారని అనడం కరెక్ట్ కాదన్నది విక్రమ్ పూల విశ్లేషణ.

‘ఎన్టీయార్ జీవితంలోకి లక్ష్మీపార్వతి వచ్చాక చాలా చాలా మార్పులు చోటు చేసుకున్నాయి. లక్ష్మీపార్వతి రాకతో, పార్టీలోనూ.. ప్రభుత్వంలోనూ అవాంఛనీయ పరిణామాలు చాలానే జరిగాయి. టిక్కెట్ల కేటాయింపు దగ్గర్నుంచి, పదవుల పంపకాల వరకూ లక్ష్మీపార్వతి కల్పించుకునేవారు.. అది పార్టీకి చాలా చేటు చేసింది..’ అంటున్నారు విక్రమ్ పూల.

పార్టీకి నష్టం జరుగుతున్న చాలామంది స్వర్గీయ ఎన్టీయార్ మీద గౌరవంతో ఏమీ అనలేకపోయేవారనీ, అలాంటివారంతా చంద్రబాబు దగ్గరే మొరపెట్టుకునేవారనీ, వారందరి ఒత్తిడి నేపథ్యంలోనే పార్టీ పగ్గాలు చంద్రబాబు తీసుకోవాల్సి వచ్చిందని విక్రమ్ పూల అంటున్నారు.

‘వైస్రాయ్ ఘటన వెనుక చంద్రబాబు హస్తం ముమ్మాటికీ లేదు. చంద్రబాబుని బలపర్చిన ఎమ్మెల్యేలంతా లోపల, వైస్రాయ్ హోటల్‌లో వున్నారు. బయట ఎన్టీయార్ సహా ఆయన అనుచరులంతా అనవసర హంగామా చేశారు. బయట నుంచి వచ్చినవాళ్ళలో కొందరు పనిగట్టుకుని ఎన్టీయార్ పక్కనున్న కొందరు నాయకుల ఆవేశపూరిత మాటల నేపథ్యంలో , వారి లక్ష్యంగా చెప్పులు విసరగా.. అది చంద్రబాబు ప్రణాళిక ప్రకారం చేయించినట్టు బయటికి వచ్చిందని, అది చంద్రబాబు కనుసన్నల్లో జరిగింది కాదు.. ’ అని విక్రమ్ పూల చెప్పుకొచ్చారు.

‘నాతోనే పార్టీ పుట్టింది.. నాతోనే పార్టీ అంతమైపోతుంది..’ అని స్వర్గీయ ఎన్టీయార్ చెప్పిన మాటలతోనే, పార్టీ పగ్గాలు చేపట్టాల్సిందిగా చంద్రబాబుపై ఒత్తిడి పెరిగిందన్నది విక్రమ్ పూల విశ్లేషణ. సెక్రెటేరియట్‌కి ‘భోజనం’ పేరుతో వచ్చి, ప్రభుత్వ వ్యవహారాల్లో లక్ష్మీపార్వతి తలదూర్చి, ప్రభుత్వానికి చెడ్డపేరు తెచ్చిన విషయాన్ని పక్కన పెట్టి, చంద్రబాబు మీద బురద చల్లడం అనేది సబబు కాదని విక్రమ్ పూల అంటున్నారు.

అప్పట్లో ఎన్టీయార్, లక్ష్మీపార్వతి.. ఇద్దరూ తప్పు చేశారన్న విక్రమ్ పూల, సంక్షోభ సమయంలో చంద్రబాబు గనుక, పార్టీ బాగు కోసం కఠిన నిర్ణయం తీసుకుని వుండకపోతే, ఈ రోజు తెలుగుదేశం పార్టీనే వుండేది కాదని చెప్పారు విక్రమ్ పూల తన తాజా ఇంటర్వ్యూలో.