కిషన్ రెడ్డి పాదయాత్ర: ఏపీలో బీజేపీకి ‘ఆశీర్వాదం’ లభిస్తుందా.?

కేంద్ర మంత్రి కిషన్ రెడ్డి రెండు నగరాల్లో ఆంధ్రప్రదేశ్ రాష్ట్రంలో జన ఆశీర్వాద యాత్ర నిర్వహిస్తున్నారు. నిన్న తిరుపతిలో యాత్ర పూర్తయ్యింది.. నేడు విజయవాడలో ఈ యాత్ర జరగనుంది. రాష్ట్రంలో బీజేపీ – జనసేన మిత్రపక్షాలుగా వున్నాయి. అయితే, రెండు పార్టీల మధ్యా రాజకీయ స్నేహంపై ఎప్పటికప్పుడు అనుమానాలు తెరపైకొస్తున్నాయి. ‘అబ్బే, అదేం లేదు.. మేం కలిసే వున్నాం..’ అని పలు సందర్భాల్లో రెండు పార్టీల మధ్య జరుగుతున్న సమావేశాల ద్వారా ఇరు పార్టీలూ ఆ అనుమానాలకు తెరదించుతున్నాయి.

నో డౌట్, బీజేపీ – జనసేనల్లో.. ఓటు బ్యాంకు పరంగా పై చేయి జనసేన పార్టీదే. కానీ, ఏం లాభం.? కేంద్రంలో అధికారంలో వున్న బీజేపీ, రాష్ట్రంలో రాజకీయ పెత్తనం కోసం ఆరాటపడుతూ, ఈ క్రమంలో మిత్రపక్షం జనసేన పైనా పెత్తనం చెలాయించేందుకు ప్రయత్నిస్తోంది. తిరుపతి లోక్ సభ నియోజకవర్గ ఉప ఎన్నికలో జనసేనను కాదని, బీజేపీ తన అభ్యర్థిని నిలబెట్టడమే ఇందుకు నిదర్శనం. అందుకు ఫలితం బీజేపీ అనుభవించిందనుకోండి.. అది వేరే సంగతి.

ఇక, కిషన్ రెడ్డి ఆశీర్వాద యాత్ర విషయానికొస్తే, బీజేపీ శ్రేణులు ఎంత హంగామా చేయాలని చూస్తున్నా, అందులో పస కనిపించడంలేదు. కేంద్ర మంత్రి నిర్వహిస్తోన్న యాత్ర.. అంటే, దానికి ఎంత పొలిటికల్ హంగామా వుండాలి.? కానీ, ఆ హంగామా పెద్దగా కనిపించడంలేదు. దానికి కారణం అందరికీ తెలిసిందే.. బీజేపీకి, ఆంధ్రప్రదేశ్ రాష్ట్రంలో సీన్ లేదు. ప్రత్యేక హోదా ఇవ్వలేదు, పోలవరం ప్రాజెక్టు విషయంలో మెలిక, విశాఖ ఉక్కు పరిశ్రమ ప్రైవేటీకరణ దిశగా అడుగులు.. చెప్పుకుంటూ పోతే, బీజేపీ వైఫల్యాలు రాష్ట్రంలో చాలానే వున్నాయి.

‘విభజనతో కాంగ్రెస్ కొట్టిన దెబ్బ కంటే పెద్ద దెబ్బ బీజేపీ కొట్టింది..’ అన్న భావన ఏపీలో బలపడిపోతోంది. కానీ, ఆ నెగెటివిటీని తగ్గించుకునే ప్రయత్నమే చేయడంలేదు బీజేపీ. ఇంకాస్త నెగెటివిటీని పెంచేసుకుందాం.. మిత్రపక్షం జనసేనను కూడా ముంచేద్దామన్న కోణంలో విశాఖ ఉక్కు వివాదం.. వంటివాటిని బీజేపీ తెరపైకి తెస్తోంది. ఇలాంటి రాజకీయాలతో బీజేపీ, రాష్ట్రంలో ఎన్ని పిల్లిమొగ్గలేసినా జనం నుంచి ఆశీర్వాదం లభించదుగాక లభించదు.