మన ఠీవీ.. పీవీ: కేసీఆర్

నిరంతర సంస్కరణశీలి, సంస్కరణాభిలాషికి నిలువెత్తు నిదర్శనంగా నిలిచిన పీవీ.. తెలంగాణ ఠీవీ అని సీఎం కేసీఆర్ కొనియాడారు. పీవీ శతజయంతి ఉత్సవాలను హైదరాబాద్ లోని పీవీ జ్ఞానభూమిలో ఆదివారం ఆయన ప్రారంభించారు. పీవీ చిత్రపటానికి పూలమాల వేసి శ్రద్ధాంజలి ఘటించారు. ఈ సందర్భంగా దేశానికి పీవీ చేసిన సేవలను స్మరించుకున్నారు. 360 డిగ్రీల గొప్ప వ్యక్తిత్వమున్న వ్యక్తి పీవీ అని, ఆయన ఏ రంగంలో ఉంటే ఆ రంగంలో సంస్కరణలు తీసుకొచ్చారని పేర్కొన్నారు.

ముఖ్యమంత్రిగా ఉన్నప్పుడు భూసంస్కరణలు చేశారన్నారు. ‘భూస్వామి అయిన పీవీ నరసింహారావుకు వందల ఎకరాల భూమి ఉండేది. వారి కుటుంబానికి అవసరమైన మేరకు కొంత భూమి ఉంచుకుని దాదాపు 850 ఎకరాల భూమిని ప్రభుత్వానికి అప్పగించిన నిఖార్సైన వ్యక్తిత్వం ఆయన సొంతం. సంస్కరణలు తన కుటుంబం నుంచే ప్రారంభం కావాలని ఈ నిర్ణయం తీసుకున్నారు’ అని కేసీఆర్ ప్రశంసలు కురిపించారు.

కేంద్రంలో విద్యాశాఖ పేరును హెచ్చార్డీగా మార్పించిన ఘనత ఆయనదేనన్నారు. పీవీ వ్యక్తిత్వాన్ని వర్ణించడానికి మాటలు చాలవని వ్యాఖ్యానించారు. 360 డిగ్రీల పర్సనాలిటీ పీవీ అని పెద్ద పుస్తకమే రాయొచ్చన్నారు. నెహ్రూకి సమాంతరమైన వ్యక్తి పీవీ అని స్పష్టంచేశారు. పీవీ నిరంతర విద్యార్థి, అధ్యయనశీలి, సామాజిక దృక్పథం కలిగిన పీవీ గురించి ఎంత చెప్పినా తక్కువేనన్నారు. కుల, ధన బలం అనేదే లేకుండా ఆయన రాజకీయ ప్రస్థానం సాగిందని ప్రశంసించారు.

ప్రధానిగా ఆయన బాధ్యతలు స్వీకరించే నాటికి దేశ ఆర్థిక పరిస్థితి దారుణంగా ఉండేదన్నారు. బంగారం మొత్తం కుదువపెట్టి అప్పులు తెచ్చుకునే పరిస్థితి ఉండేదని, చరిత్ర చూస్తే అదంత తెలుస్తుందని పేర్కొన్నారు. అలాంటి సమయంలో ఆర్థికవేత్త మన్మోహన్ సింగ్ ను ఆర్థిక మంత్రిగా చేసి ఎన్నో విప్లవాత్మక నిర్ణయాలు తీసుకుని ఆర్థిక వ్యవస్థను గాడిన పెట్టారని తెలిపారు. ఆయన చర్యల ఫలాలను ప్రస్తుతం మనం చూస్తున్నామని వివరించారు.

అయితే, ప్రపంచాన్ని దేశం వైపు చూసేలా చేసిన వ్యక్తికి సరైన గౌరవం దక్కలేదని కేసీఆర్ ఆవేదన వ్యక్తంచేశారు. ఇందుకు గల కారణాలను ప్రస్తావించడానికి ఇది సమయం కానందున వాటి జోలికి వెళ్లడంలేదంటూ పరోక్షంగా కాంగ్రెస్ కు చురకలంటించారు. పార్లమెంటులో పీవీ చిత్రపటం పెట్టాలని కోరతామన్నారు. మాజీ ప్రధానికి ఇవ్వాల్సిన గౌరవం ఇవ్వలేదని విమర్శలు చేశారు. అలాగే పీవీకి భారతరత్న ఇవ్వాల్సిందిగా అసెంబ్లీలో తీర్మానం చేసి పంపిస్తామని వెల్లడించారు. తెలుగు అకాడమీకి పీవీ పేరు పెట్టాలంటూ ప్రతిపాదనలు వచ్చాయని, తప్పకుండా దానిని పరిశీలించి ఆ మేరకు నిర్ణయం తీసుకుంటామని కేసీఆర్ తెలిపారు.