Janasena: ముఖ్యమంత్రి జగన్‌ని ప్రెస్ మీట్‌లో కూర్చోబెట్టిన జనసేన.!

అరరె.. ముఖ్యమంత్రి వైఎస్ జగన్ మోహన్ రెడ్డి ఎట్టకేలకు మీడియా ముందుకు వచ్చారే.! ప్రెస్ మీట్‌లో కనిపించారే.! ఏంటీ, ఇదంతా నిజమేననుకునేరు.! ‘కుక్క కాటుకి చెప్పు దెబ్బ’ అనొచ్చా.! బాగోదు.. ముఖ్యమంత్రికి సంబంధించిన వ్యవహారం కదా.. మరీ, అంత దారుణమైన పదజాలాన్ని అస్సలు వాడకూడదు.!

కానీ, గౌరవం అనేది ఇచ్చిపుచ్చుకోవాలి కదా.! ముఖ్యమంత్రి పదవిలో వున్న వ్యక్తి ఎంత బాధ్యతగా వ్యవహరించాలి.! బాధ్యత మరచి వ్యవహరిస్తే, జనం ఆ ‘గౌరవం’ ఆయా వ్యక్తులకు ఇవ్వడానికి అస్సలు ఇష్టపడరు.

అసలు విషయమేంటంటే, ఇటీవల ‘సిద్ధం’ పేరుతో వైసీపీ నిర్వహించిన బహిరంగ సభలో, ముఖ్యమంత్రి వైఎస్ జగన్ ఎన్నికల సమర శంఖారావాన్ని పూరించేశార్లెండి.! అయితే, శంఖం ఊదిన జగన్.. ఉత్తుత్తి యాక్షన్ చేస్తే, బ్యాక్‌గ్రౌండ్‌లో ట్రెయిన్ సౌండ్ ప్లే చేశారు.. అది వేరే వ్యవహారం.

ఆ సభలో, జనసేన అధినేత పవన్ కళ్యాణ్ బొమ్మని వెటకారంగా ఏర్పాటు చేసి, ఆ బొమ్మ ముందు ఓ బాక్సింగ్ బ్యాగ్ పెట్టారు. దాన్ని కసితీరా కొట్టారు కొందరు ఉన్మాదులైన వైసీపీ కార్యకర్తలు. ఏ గంజాయి పీల్చారో… ఏ డ్రగ్స్ ఎక్కించుకున్నారోగానీ.. అది చూశాక, ఆ ఉన్మాదం అత్యంత హేయం.. అని రాష్ట్ర ప్రజానీకం ముక్త కంఠంతో నినదిస్తోంది.

వైసీపీ అలా చేసింది కాబట్టి, ముఖ్యమంత్రిని అవమానించలేదు జనసేన పార్టీ. రాష్ట్ర ప్రభుత్వ వైఫల్యాల్ని పద్ధతిగా ప్రశ్నిస్తూ, ప్రెస్ మీట్‌లోకి సీఎం జగన్ మోహన్ రెడ్డి ఫొటోని తీసుకొచ్చారు. కుర్చీలో పెట్టారు ఆ బొమ్మని.!

‘మేమేమీ మీలా అవమానించదలచుకోలేదు.. మీ చర్యలు అత్యంత హేయం, జుగుప్సాకరం.. నా సుదీర్ఘ రాజకీయ జీవితంలో ఇలాంటివి చూడలేదు..’ అంటూ అదే వేదికపై జనసేన ముఖ్య నేత నాదెండ్ల మనోహర్ వ్యాఖ్యానించారు.

‘వీర మహిళలతో కొట్టించి వుండాల్సింది ఆ బొమ్మని..’ అంటూ కొందరు నెటిజనం అభిప్రాయ పడుతున్నారుగానీ, ఆ స్థాయికి జనసేన దిగజారదన్న సంకేతాల్ని అయితే జనసేన స్పష్టంగానే ఇచ్చేసింది. ఇంతకీ, ఇప్పుడైనా ముఖ్యమంత్రి వైఎస్ జగన్ మోహన్ రెడ్డి మీడియా ముందుకొస్తారా.? ప్రెస్ మీట్‌ని ఫేస్ చేయగలుగుతారా.?