ప్రత్యేక హోదా కాలగర్భంలో కలిసిపోయినట్టేనా?

ఐదేళ్లపాటు 13 జిల్లాల ఆంధ్రప్రదేశ్‌లో వైఎస్‌ జగన్‌ రాజకీయంగా యాక్టివ్‌గా ఉండగలిగారంటే, దానికి కారణం ప్రత్యే హోదా అంశమే. ప్రత్యేక హోదా ఉద్యమానికి బ్రాండ్‌ అంబాసిడర్‌ని తానేనంటూ వైఎస్‌ జగన్‌ చాలా హంగామా చేశారు. నరేంద్రమోడీ ప్రభుత్వం ప్రత్యేక హోదా ఇవ్వదని తెలిసి, వైఎస్‌ జగన్‌ తన ఇమేజ్‌ని పెంచుకోవడానికి హోదా ఉద్యమాన్ని ఓ ఆయుధంగా మార్చుకున్నారు. కేంద్రం నుండి రాష్ట్రానికి హోదా తెప్పించుకోలేని చంద్రబాబు అసమర్ధత వైఎస్‌ జగన్‌కి వరంలా మారింది. నాలుగేళ్లు హోదా పేరుతో చాలా రకాల పబ్లిసిటీ స్టంట్లు చేసి, చివరికి అత్యంత వ్యూహాత్మకంగా, ఉప ఎన్నికలు వచ్చే పరిస్థితి లేకుండా చూసుకుని, అప్పటి తమ ఎంపీలతో రాజీనామా చేయించారు వైఎస్‌ జగన్‌.

కానీ ఇప్పుడు వైఎస్సార్‌ కాంగ్రెస్‌ పార్టీ తరపున ఏ ఒక్క నేత కూడా ప్రత్యేక హోదా గురించి మాట్లాడడానికి కూడా ఇష్టపడట్లేదు. అధినేత వైఎస్‌ జగన్‌ ఢిల్లీకి వెళ్లి మోడీకి సాగిలా పడి వచ్చాక వైసీపీ నేతలో ప్రత్యే హోదాపై మాట్లాడడానికి ఏమీ లేదు. అప్పుడు చంద్రబాబు చేసిందీ, ఇప్పుడు వైఎస్‌ జగన్‌ చేస్తున్నదీ ఒక్కటే. అప్పట్లో తమ ఎంపీలతో ప్రత్యేక హోదా కోసం రాజీనామా చేయించిన వైఎస్‌ జగన్‌ ఇప్పుడింతలా బేలతనం చూపించడం చాలా మందిని ఆశ్చర్యపరుస్తోంది. అప్పుడూ బీజేపీకి కేంద్రంలో స్పష్టమైన మెజార్టీ ఉంది. ఇప్పుడూ అదే పరిస్థితి. అప్పటికీ, ఇప్పటికీ వైఎస్‌ జగన్‌ గుర్తించిన తేడా ఏంటో ఆయన ప్రత్యేక హోదా విషయంలో ఎందుకిలా యూటర్న్‌ తీసుకున్నారో ఎవరికీ అర్ధం కావడం లేదు.

పాతిక మంది ఎంపీలను ఇస్తే, కేంద్రం మెడలు వంచి ప్రత్యేక హోదా సాధిస్తామని ఎన్నికల ప్రచారంలో కూడా వైఎస్‌ జగన్‌ చెప్పారు. పొరుగు రాష్ట్ర ఎంపీల్ని కలుపుకుని కేంద్రంపై పోరాడతామన్నారు. ఇప్పుడు ఆ పొరుగు రాష్ట్ర ముఖ్యమంత్రి కేసీఆర్‌తో కలిసి వేదిక పంచుకుని ముఖ్యమంత్రిగా పదవీ ప్రమాణ స్వీకారం చేసిన వైఎస్‌ జగన్‌, ఆ వేదిక పై నుండి ప్రత్యేక హోదా సాధించి తీరతాం.. అని నినదించలేకపోయారు. ఆంధ్రప్రదేశ్‌ నడిబొడ్డున ప్రత్యేక హోదాని జగన్‌ పాతరేయడం వెనుక నడిచిన రాజకీయం ఏంటో, హోదా గురించి మాట్లాడలేనంతగా వైఎస్‌ జగన్‌పై వచ్చిన రాజకీయ ఒత్తిడులేంటో తెలియాల్సి ఉంది.

తండ్రిని మించిన పేరు, ప్రఖ్యాతలు సంపాదిస్తాననీ, విశ్వసనీయత విషయంలో తనకు తిరుగే లేదని చెప్పుకునే వైఎస్‌ జగన్‌, ప్రత్యేక హోదా విషయంలో ఇంతలా కేంద్రం ముందు తలొంచుతారని ఎవరూ ఊహించలేదు. ఇప్పుడే కొత్తగా ముఖ్యమంత్రి అయ్యారు కనుక, పాలనా వ్యవహారాలపై తనదైన ముద్ర వేయాలి కనుక ఇంకొంత కాలం వేచి చూస్తే అయినా ప్రత్యేక హోదా విషయంలో జగన్‌ ఆలోచన మారుతుందా.? లేదంటే, ఢిల్లీ పెద్దల కన్నెర్రకు జడిసి ప్రత్యేక హోదాను జగన్‌ కాలగర్భంలో కలిపేశారా.? వేచి చూడాలి.