వైఎస్ వద్దంది.. జగన్ కు ముద్దైంది!

ఆంధ్రప్రదేశ్ లో మీడియాను ఆంక్షల చట్టంలో బిగించే జీవో వచ్చేసింది. నాడు వైఎస్ వద్దన్న జీవోను నేడు ఆయన తనయుడు జగన్ తెచ్చేశారు. ఇకపై ప్రింట్, ఎలక్ట్రానిక్, సోషల్.. మీడియా ఏదైనా సరే, ఆధారాలు లేకుండా ప్రభుత్వానికి వ్యతిరేకంగా కథనాలు రాస్తే కేసులు నమోదు కానున్నాయి. ఈ మేరకు ఆయా శాఖల కార్యదర్శులకు అధికారాలను కట్టబెడుతూ ఏపీలోని వైఎస్సార్ సీపీ సర్కారు ఉత్తర్వులు జారీచేసింది.

ఈ విషయంలో ప్రతిపక్షాల విమర్శలను సైతం ఖాతరు చేయకుండా జగన్ ప్రభుత్వం ఆదేశాలిచ్చింది. దీంతో ఇకపై ఎలాంటి ఆధారాలు లేకుండా పత్రికల్లో ప్రభుత్వానికి వ్యతిరేకంగా వార్తలు ప్రచురించినా, టీవీల్లో కథనాలు ప్రసారం చేసినా, సోషల్ మీడియాలో పోస్టింగులు పెట్టినా.. బాధ్యులపై ఆయా శాఖల కార్యదర్శులు నేరుగా కేసులు పెట్టే అవకాశం లభిస్తుంది. ఇప్పటివరకు ఈ అధికారం కేవలం ఐ అండ్ పీఆర్ స్పెషల్ కమిషనర్ కు మాత్రమే ఉండేది. తాజాగా వివిధ శాఖల కార్యదర్శులకు ఈ అధికారం లభించింది.

2007లో ఇలాంటి జీవోనే అప్పటి సీఎం వైఎస్ రాజశేఖర్ రెడ్డి తీసుకొచ్చారు. అయితే, దీనిపై విపక్షాలు రాద్దాంతం చేయడం.. జర్నలిస్టు సంఘాలు కూడా వ్యతిరేకించడం.. వైఎస్ సన్నిహితులు సైతం ఈ విషయంలో విముఖత ప్రదర్శించడంతో రాజశేఖర్ రెడ్డి వెనక్కి తగ్గారు. ఆ జీవో ఎవరి స్థాయిలో వచ్చిందో, ఎవరు నిర్ణయం తీసుకున్నారో తెలియదని, అది అవసరం లేని జీవో అని చెప్పి ఉపసంహరించుకున్నారు. అప్పటితో ఆ సమస్య సమసిపోయింది. ఇప్పుడు అలాంటి జీవోకే మరింత పదును పెట్టి జగన్ తీసుకొచ్చారు.

అయితే, ఏది ప్రభుత్వ వ్యతిరేక వార్త? ఏది అనుకూల వార్త అన్నది ఎలా నిర్ణయిస్తారో ఇంకా క్లారిటీ లేదు. ఫలానా శాఖలో అవినీతి జరుగుతోందని కథనం వస్తే, సదరు శాఖ కార్యదర్శి దానిని విచారించడం మానేసి ఇది ప్రభుత్వ వ్యతిరేక వార్త అని కేసు పెడితే ప్రయోజనం ఏముంటుంది అనే వాదనలు వినిపిస్తున్నాయి. ఈ విషయంలో పూర్తిస్థాయి మార్గదర్శకాలు విడుదలైతేనే కాస్త స్పష్టత వచ్చే అవకాశం ఉంది.