దుష్యంత్ సక్సెస్.. పవన్ ఫెయిల్.. ఎలా?

హర్యానాలో ఎన్నికలు ముగిశాయి. ఎలాంటి సమస్యలూ లేకుండా ఖట్టర్ నేతృత్వంలో బీజేపీ సంకీర్ణ సర్కారు ఏర్పాటైంది. డిప్యూటీ సీఎంగా జేజేపీ అధినేత దుష్యంత్ చౌతాలా ప్రమాణ స్వీకారం చేశారు. ప్రస్తుతం ఆయన గురించి రాజకీయ వర్గాల్లో చర్చ జరుగుతోంది. ఎన్నికల్లో తీవ్రంగా పోరాడిన ఆయన.. ఫలితాలు వెలువడిన తర్వాత ఏకంగా కింగ్ మేకర్ పాత్ర పోషించి, డిప్యూటీ సీఎం అయిపోయారు.

ఇప్పుడు తెలుగు రాష్ట్రాల్లో ముఖ్యంగా ఆంధ్రప్రదేశ్ లో జనసేన అధినేత పవన్ కల్యాణ్ ను దుష్యంత్ తో పోల్చి చూస్తున్నారు. దుష్యంత్ సక్సెస్ కావడానికి, పవన్ ఫెయిల్ అవడానికి కారణాలను విశ్లేషిస్తున్నారు. దుష్యంత్ వయసు 31 ఏళ్లే అయినా.. జాతీయ పార్టీలైన కాంగ్రెస్, బీజేపీలపై తీవ్రస్థాయిలో పోరాడారు. ఆయనకు సినీ గ్లామర్ లేకపోయినా.. ఎంపీగా పనిచేసిన అనుభవం ఉంది. అటు కాంగ్రెస్ ను, ఇటు బీజేపీని సమాన ప్రత్యర్థులుగా చూడటంతో పలువురు తటస్థులు దుష్యంత్ వైపు మొగ్గు చూపారు. దీంతో పది సీట్లు గెలుచుకుని కింగ్ మేకర్ కాగలిగారు.

అయితే, పవన్ మాత్రం అలా వ్యవహరించలేకపోయారు. ఎన్నికల సమయంలో ప్రతిపక్షంలో ఉన్న వైఎస్సార్ సీపీ లక్ష్యంగానే పోరాడారు.. ఆ పార్టీపైనే విమర్శలు చేశారు. తెలుగుదేశం పార్టీపై పల్లెత్తు మాట అనలేదు. మరోవైపు ఆయన తెలుగుదేశం పార్టీకి రహస్య మిత్రుడు అంటూ వైఎస్సార్ సీపీ బలంగా చేసిన ప్రచారం కూడా వ్యతిరేకంగా మారింది. ఫలితంగా ఒకే ఒక్క సీటుతో సరిపెట్టుకోవాల్సి వచ్చింది. అలాకాకుండా దుష్యంత్ తరహాలో ఇటు వైఎస్సార్ సీపీని, అటు టీడీపీని కూడా సమాన స్థాయిలో ప్రత్యర్థులుగా చూసి ఉంటే మరికొన్ని సీట్లు గెలుపొందే అవకాశం ఉండేదని అంటున్నారు.

ఎన్నికల్లో ఇంత దెబ్బ తిన్నా.. పవన్ వైఖరిలో ఇంకా మార్పు రాలేదని విశ్లేషణలు వినిపిస్తున్నాయి. ఇప్పటికీ టీడీపీపై ఈగ వాలనీయకుండా చూసే విధంగానే ఆయన వ్యవహరిస్తున్నారని చెబుతున్నారు. ఇలాగే ఉంటే జనసేనకు రాజకీయంగా కష్టమేననే అభిప్రాయాలు వ్యక్తమవుతున్నాయి.