రాజధానికి డబ్బులు అడిగారు సరే ఏ రాజధానికో చెప్పండి జగన్ సారూ..!!

ఈమధ్య జగన్ కు ఢిల్లీపై విపరీతమైన ప్రేమ కలిగినట్టుగా ఉంది. అందుకే ఢిల్లీ ఢిల్లీ అని కలవరిస్తున్నారు. బుధవారం రోజున ఢిల్లీ వెళ్లి ప్రధాని మోడీని కలిసిన జగన్ మరోసారి శుక్రవారం రోజున ఢిల్లీ వెళ్లారు. బుధవారం రోజున ఢిల్లీలో మోడీని కలిసి వచ్చిన తరువాత శుక్రవారం సిబిఐ కోర్టు నుంచి మినహాయింపు లభించింది. దీని అర్ధం ఏంటో అందరికి తెలిసిందే. శుక్రవారం రోజున ఢిల్లీలో అమిత్ షాను కలిసి అన్ని విషయాలు మాట్లాడారు.

అంతకు ముందు ఎన్నిసార్లు తిరిగినా అపాయింట్మెంట్ దొరకలేదు. కానీ, ఇప్పుడు సడెన్ గా అపాయింట్మెంట్ ఎలా దొరికింది. ప్రధాని మోడీతో సహా అందరి అపాయింట్మ్నెట్ జగన్ కు దొరకడం వెనుక కారణాలు ఉన్నట్టుగా తెలుస్తున్నాయి. త్వరలోనే జగన్ ఎన్డీయేలో చేరబోతున్నారని అందుకే ఆయనకు త్వరగా అపాయింట్మెంట్ దొరుకుతున్నాయని అంటున్నారు.

అసలే కొత్త రాష్ట్రం. ఆర్ధికంగా ఇబ్బందులు పడుతున్నది. పైగా రోజుకో సంక్షేమ పధకం రిలీజ్ చేస్తున్నారు. వీటికి డబ్బులు ఎక్కడి నుంచి వస్తాయి. కేంద్రం ఇవ్వాల్సిందే కదా. పైగా ఆదాయం లేదు. ఈ విషయం అందరికి తెలుసు. ఈ సమయంలో కేంద్రంతో కొరివి పెట్టుకోవడం కంటే చేయి చేయి కలిపితే బాగుంటుందనే ఆలోచనతో జగన్ ఈ నిర్ణయం తీసుకున్నారని, దానికి యన ముహూర్తం కూడా పెట్టుకున్నారని అంటున్నారు.

ఇది వేరే విసహాయం అనుకోండి. అమిత్ షాను కలిసినపుడు జగన్ రాష్ట్రానికి రావలసిన నిధులు, పెండింగ్ లో ఉన్న ప్రాజెక్టులు, విభజన చట్టంలో పేర్కొన్న అంశాలు అన్నింటి గురించి మాట్లాడారు. రాష్ట్రానికి కేంద్రం రూ. 2500 కోట్ల రూపాయల సహాయం చేస్తామని ఒప్పుకుంది. అయితే, ఇప్పటి వరకు కేంద్రం కేవలం రూ. 1000 కోట్లు మాత్రమే ఇచ్చింది.

మిగతా రూ. 1500 కోట్లు ఇవ్వాలని షా ను జగన్ కోరారు. బాగానే ఉన్నది. అయితే ఏ రాజధానిని ఈ గ్రాండ్ రిలీజ్ చేయాలో కేంద్రానికి తెలియడం లేదు. కేంద్రం వద్దకు ఇంకా మూడు రాజధానుల అంశం చేరలేదు. అఫీషియల్ గా మూడు రాజధానులకు సంబంధించిన బిల్లు కేంద్రానికి వెళ్ళాలి. కేంద్రం దాన్నిపార్లమెంట్ లో పెట్టి ఒకే చేయాలి. రాష్ట్రపతి ఆమోదముద్ర వేయాలి. అప్పటి వరకు అమరావతి మాత్రమే రాజధానిగా ఉంటుంది.

ఒకవేళ ఇప్పుడు కేంద్రం ఆ రూ. 1500 కోట్లు రిలీజ్ చేస్తే అమరావతి కోసమే వినియోగిస్తారా లేదంటే మూడు రాజధానుల కోసం వినియోగిస్తారా ? ఇవన్నీ ప్రస్తుతానికి ప్రశ్నలే. సమాధానాలు కావాలంటే మరికొన్ని రోజులు ఆగాల్సిందే.