మనోళ్ల వల్లే ఆ హెలికాప్టర్ కూలింది

శతృదేశ విమానాలు, హెలికాప్టర్లను కూల్చివేయడానికి క్షిపణలు ప్రయోగించడం కామన్. అయితే, మన మిస్సైల్ కారణంగా మన హెలికాప్టరే కూలిపోయిన విషయం తాజాగా వెల్లడైంది. ఇది అత్యంత భారీ తప్పిదమని భారత వైమానిక దళం (ఐఏఎఫ్) స్వయంగా పేర్కొంది.

ఈ ఏడాది ఫిబ్రవరి 26న పాకిస్తాన్ బాలాకోట్ లోని ఉగ్రవాద శిబిరాలపై ఐఏఎఫ్ బాంబుల వర్షం కురిపించిన సంగతి తెలిసిందే. ఆ మరుసటి రోజు పాక్ ఎఫ్-16 విమానాలు మన భూభాగంలోకి చొచ్చుకురాగా, మన సుఖోయ్-30 విమానాలతోపాటు మిరాజ్-2000 విమానాలు వాటిని వెంబడించాయి. ఈ క్రమంలో వింగ్ కమాండర్ అభినందన్ పాక్ ఎఫ్-16 విమానాన్ని కూల్చివేశాడు.

అదే సమయంలో ఆయన మిరాజ్ విమానం కూడా కూలిపోగా, అభినందర్ పాక్ దళాల చేతికి చిక్కాడు. అదే రోజు శ్రీనగర్ లో భారత వైమానిక దళానికి చెందిన హెలికాప్టర్ ఒకటి కూలిపోయింది. అందులో ఉన్న ఆరుగురు సిబ్బంది ప్రాణాలు కోల్పోయారు. ఇది పాకిస్తాన్ పనేమో అని తొలుత అనుమానాలు వ్యక్తంకాగా, సాంకేతిక కారణాలతోనే అది కూలిపోయిందని అధికారులు తెలిపారు.

ఈ నేపథ్యంలో ఈ ఘటన జరిగిన ఏడు నెలల తర్వాత ఆసక్తికరమైన సంగతిని వెల్లడించారు. ఆ హెలికాప్టర్ మన అధికారుల తప్పిదం కారణంగానే కూలిపోయిందని ఐఏఎఫ్ చీఫ్ ఎయిర్ చీఫ్ మార్షల్ రాకేశ్ కుమార్ సింగ్ బహదూరియా తెలిపారు. ఐఏఎఫ్ చీఫ్ గా బాధ్యతలు స్వీకరించిన ఆయన శుక్రవారం తొలిసారిగా మీడియాతో మాట్లాడారు. గత ఏడాది కాలంగా భారత వైమానిక దళం ఎన్నో గొప్ప విజయాలను సాధించిందని చెప్పారు.

ముఖ్యంగా బాలాకోట్ దాడి సంఘటనను ఆయన ప్రస్తావించారు. ఆ దాడులకు సంబంధించిన వీడియోలను విడుదల చేశారు. భవిష్యత్తులో బాలాకోట్ తరహా దాడులు జరుగుతాయా అని ప్రశ్నించగా.. వారు (పాకిస్థాన్) ఉగ్రదాడులకు తెగబడితే దానిపై ప్రభుత్వ నిర్ణయం మేరకు తాము స్పందిస్తామని పేర్కొన్నారు. పాక్ చొరబాట్లకు పాల్పడితే మాత్రం సహించబోమన్నారు. ఇక ఈ ఏడాది ఫిబ్రవరి 27న శ్రీనగర్ లో ఎంఐ-17 చాపర్ కూలిపోవడానికి కారణం స్వీయ తప్పిదమే అన్న విషయాన్ని ఆయన వెల్లడించారు.

తమ అధికారులు ప్రయోగించిన క్షిపణి కారణంగానే ఆ హెలికాప్టర్ కూలిపోయిందని వివరించారు. ‘‘ఈ విషయంలో దర్యాప్తు పూర్తయింది. అది పూర్తిగా మా తప్పిదం వల్లే జరిగింది. మేం ప్రయోగించిన క్షిపణి తగలడంతోనే ఆ హెలికాప్టర్ కూలిపోయింది. ఇందుకు సంబంధించి ఇద్దరు అధికారులకు సస్పెండ్ చేయాలని నిర్ణయించాం. భవిష్యత్తులో ఇలాంటివి పునరావృతం జరగకుండా చూసుకుంటాం’’ అని బహదూరియా స్పష్టంచేవారు.