ప్రశాంత్ వర్మ సినిమాటిక్ యూనివర్స్ నుండి వచ్చిన మొదటి చిత్రం హను-మ్యాన్. తేజ సజ్జ ఈ చిత్రంలో లీడ్ రోల్ లో కనిపించాడు. ప్రోమోల దగ్గరనుండి హను-మ్యాన్ ఇంప్రెస్ చేస్తూ వచ్చింది. మరి ఈరోజే విడుదలైన ఈ చిత్రం ఎలా ఉందో చూద్దామా.
కథ:
అంజనాద్రి అనే ఊరిలో ఒక దుర్మార్గుడి వల్ల అందరూ ఇబ్బందులు పడుతూ ఉంటారు. అదే ఊరిలో చిన్న చిన్న దొంగతనాలు చేసుకుంటూ జీవనం సాగిస్తుంటాడు హనుమంతు (తేజ సజ్జ). తన అక్క (వరలక్ష్మి శరత్ కుమార్) తో కలిసి ఉండే హనుమంతుకి మీనాక్షి (అమృత అయ్యర్) అంటే చాలా ఇష్టం.
ఒకానొక సంఘటనలో మీనాక్షి ను ఆపద నుండి కాపాడే క్రమంలో హనుమంతు సూపర్ హీరో అయ్యే విధంగా హనుమంతుడి శక్తులన్నీ తనకు వస్తాయి. అలా ఎలా జరుగుతుంది? దాని తర్వాత జరిగే పరిణామాలు ఏంటి?
నటీనటులు:
హనుమంతుగా తేజ సజ్జ పెర్ఫార్మన్స్ సూపర్. తన కెరీర్ లో ఇప్పటివరకూ రెండు సినిమాలు చేసిన తేజ, ఈ సినిమాతో పరిణితి చెందిన నటుడిగా కనిపిస్తాడు. యాక్షన్, కామెడీ, డ్రామా… ఇలా జోనర్ ఏదైనా హను-మ్యాన్ లో తేజ సజ్జ సులువుగా ఒదిగిపోయాడు.
అక్క పాత్రలో వరలక్ష్మి శరత్ కుమార్ బాగానే చేసింది. ఎక్కువగా విలన్ పాత్రలు చేసే ఆమెకు ఇది కొంచెం భిన్నమైన పాత్ర అనుకోవచ్చు. సెకండ్ హాఫ్ లో ఒక సీన్ లో ఆమెకు ది బెస్ట్ మూమెంట్ పడిందని చెప్పొచ్చు. హనుమంతు ప్రియురాలిగా అమృత అయ్యర్ కూడా డీసెంట్ పెర్ఫార్మన్స్ ఇచ్చింది.
సూపర్ విలన్ గా వినయ్ రాయ్ కూడా సూపర్. లుక్స్ పరంగా పెర్ఫెక్ట్ గా సెట్ అయ్యాడు. ఇక సైంటిస్ట్ గా వెన్నెల కిషోర్ సర్ప్రైజ్ చేస్తాడు. ఇక కామెడీ పరంగా గెటప్ శ్రీను, సత్యలు ఇంప్రెస్ చేస్తారు.
సాంకేతిక నిపుణులు:
కథ మూలం రొటీన్ అయినా, హను-మ్యాన్ స్క్రీన్ ప్లే ఇంప్రెసివ్ గా సాగుతుంది. పౌరాణిక సూపర్ హీరో పాత్రకు, సైన్స్ ఫిక్షన్, ఫాంటసీలను జోడించిన విధానం సూపర్బ్ అని చెప్పొచ్చు. డైలాగ్స్ కూడా సినిమాకు తగ్గట్లుగా సాగాయి. అక్కడక్కడా కొంచెం ల్యాగ్స్ ఉన్నా కానీ మొత్తంగా సినిమా మాత్రం ఇంప్రెస్ చేస్తుంది. ఈ కథలోకి కోతి పాత్ర (దానికి రవితేజ డబ్బింగ్) జొప్పించి విధానం బట్టి అర్ధం చేసుకోవచ్చు రైటింగ్ ఎంత పకడ్బందీగా సాగిందని.
దర్శకత్వ పరంగా ప్రశాంత్ వర్మ ఇంప్రెస్ చేసాడు. చాలా చోట్ల డైరెక్షన్ ఫస్ట్ రేట్ గా సాగింది. అటు దేవుడైన హనుమంతుడిని, సూపర్ హీరోకి కనెక్ట్ చేసిన విధానం మెయిన్ గా ఇంప్రెస్ చేస్తుంది. దాశరధి శివేంద్ర అందించిన సినిమాటోగ్రఫీ వర్క్ సూపర్బ్. సాయి బాబు తలారి ఎడిటింగ్ వర్క్ కూడా బాగుంది. అయితే కనీసం 10 నిముషాలు ట్రిమ్ చేసే అవకాశముంది. గౌర హరి, అనుదీప్ దేవ్, కృష్ణ సౌరభ్ అందించిన సంగీతం సూపర్బ్ అని చెప్పాలి. ముఖ్యంగా గౌర హరి బ్యాక్ గ్రౌండ్ మ్యూజిక్ కొన్ని చోట్ల గూస్ బంప్స్ తెప్పిస్తుంది. ఆర్ట్ డిపార్ట్మెంట్ కూడా ఇంప్రెస్ చేస్తుంది.
మరీ ముఖ్యంగా ఈ సినిమా విఎఫ్ఎక్స్ గురించి మాట్లాడుకోవాలి. అంత తక్కువ బడ్జెట్ లో ఆ రేంజ్ విజువల్స్ ఎలా సాధించారో దర్శకుడే చెప్పాలి. నిర్మాణ విలువలు చాలా గ్రాండ్ గా అనిపిస్తాయి.
ప్లస్ పాయింట్స్:
- తేజ సజ్జ పెర్ఫార్మన్స్
- హనుమంతుడి రిఫరెన్స్ ఉన్న సీన్స్
- ఇంటర్వెల్ ఎపిసోడ్
- సూపర్ హీరో కాన్సెప్ట్
- క్లీన్ కామెడీ
- బ్యాక్ గ్రౌండ్ స్కోర్
- విఎఫ్ఎక్స్
మైనస్ పాయింట్స్:
- మిడిల్ పోర్షన్స్ లో డ్రాగ్
- ప్రీక్లైమాక్స్ సీక్వెన్స్
- రిపీట్ గా అనిపించే విలన్ ఎపిసోడ్స్
విశ్లేషణ:
ఈ సంక్రాంతికి చూడాల్సిన పెర్ఫెక్ట్ సంక్రాంతి ఎంటర్టైనర్ హను-మ్యాన్. పెద్దల కన్నా పిల్లలు ఎక్కువగా ఇష్టపడే అంశాలు ఇందులో ఎక్కువగా ఉన్నాయి. అక్కడక్కడా కొంచెం డ్రాగ్ తప్పించి ఈ సినిమా విషయంలో పెద్ద కంప్లైంట్స్ అంటూ ఏం లేవు. హ్యాపీగా ఈ సంక్రాంతి మీ కుటుంబంతో కలిసి హను-మ్యాన్ తో ఎంజాయ్ చేయండి
తెలుగు బులెటిన్ రేటింగ్: 3.25/5