న్యాయ వ్యవస్థపై కుట్రలట.. ఇదెక్కడి ‘న్యాయం’.?

ఆషామాషీ ఆరోపణ కాదు. అత్యంత తీవ్రమైన అంశమిది. ఏకంగా న్యాయ వ్యవస్థ మీద కుట్రలు జరుగుతున్నాయంటూ ఓ కథనాన్ని టీడీపీ అనుకూల మీడియా వండి వడ్డించింది. మాజీ న్యాయమూర్తి ఈశ్వరయ్య నేతృత్వంలో కథ నడుస్తోందన్నది సదరు కథనం సారాంశం. బీసీ వర్గాలకు చెందిన ఈశ్వరయ్య, ఇటీవల రాష్ట్ర హైకోర్టు మీద ఆరోపణలు చేయడం, ఆ వ్యవహారంపై కోర్టులో విచారణ జరుగుతుండడం, ఇదంతా కుట్ర కోణంలోనే జరుగుతోందన్న విమర్శలు రావడం తెల్సిన విషయాలే. కరోనాకీ, హైకోర్టు కార్యకలాపాలకు లింకు పెట్టి న్యాయ వ్యవస్థలోని కీలక వ్యక్తులపై ఆరోపణలు చేయడం పెను దుమారం రేపింది.

ఇదిలా వుంటే, చిత్తూరు జిల్లాకి చెందిన రామకృష్ణ అనే న్యాయమూర్తి (సస్పెన్షన్‌లో వున్నారు), తాజా పరిణామాలపై హైకోర్టును ఆశ్రయించారు. న్యాయ వ్యవస్థపై కుట్ర జరుగుతోందని పేర్కొంటూ, అందుకు సంబంధించిన కొన్ని ఆడియో టేపుల్నీ న్యాయస్థానానికి సమర్పించడం గమనార్హం. ఈశ్వరయ్యతోపాటు, మరో మాజీ న్యాయమూర్తి నాగార్జున రెడ్డిలపై ఆరోపణలు చేశారు.

అధికార వైసీపీ ఈ మొత్తం వ్యవహారాన్ని నడిపిస్తోందనీ, ఈ ఎపిసోడ్‌లో ఈశ్వరయ్య అత్యంత కీలక భూమిక పోషిస్తోందనీ, ఢిల్లీ స్థాయిలో న్యాయ వ్యవస్థపై ఈశ్వరయ్య అండ్‌ టీమ్ కుట్రలు పన్నుతోందని రామకృష్ణ ఆరోపిస్తుండడం గమనార్హం. తాను చాలామందికి ఓపెన్‌ కేటగిరీలో నియామకాలు జరిపినట్లు ఈశ్వరయ్య తనతో చెప్పారంటున్నారు రామకృష్ణ. ఇదంతా నిజమేనా.? ప్రస్తుతం ఆంధ్రప్రదేశ్‌ ఉన్నది విద్యా శాఖ కమిషన్‌ ఛైర్మన్‌గా పనిచేస్తోన్న ఈశ్వరయ్య నిజంగానే న్యాయ వ్యవస్థ కుట్రపన్నుతున్నారా.? ఆయనకు ఆ స్థాయి వుందా.? అన్నది ప్రస్తుతానికైతే మిలియన్‌ డాలర్ల ప్రశ్నే.

న్యాయ వ్యవస్థలోని వ్యక్తులపై ఈ తరహా ఆరోపణలు గతంలోనే వచ్చినా, ఇవి అత్యంత తీవ్రమైనవిగా చెప్పుకోవచ్చు. ఈ విషయంపై స్పందిస్తూ, ‘సదరు కథనాలు వాస్తవం అయితే ఖచ్చితంగా నిజాలు నిగ్గు తేలాలి. ఒకవేళ నిజం కాని పక్షంలో, ఈ తరహా కథనాల్ని వండి వడ్డించినందుకు ఆయా మీడియా సంస్థలపై కఠిన చర్యలు తీసుకోవాలి..’ అంటూ జనసేన నేత, ఆ పార్టీ లీగల్‌ వింగ్‌ నాయకుడు శాంతి ప్రశాంద్‌ సింగలూరి ట్విట్టర్‌ వేదికగా అభిప్రాయపడ్డారు. ‘జడ్జిలు కూడా ప్రలోభాలకు అతీతం కాదు అనేద ఇప్పటివరకు కేవలం కొందరు మాత్రమే అభిప్రాయపడేవారు.

కానీ, ఇప్పుడు వెలుగు చూస్తున్న అంశాల నేపథ్యంలో సామాన్యల్లోనూ అదే భావన కలిగితే అది ఈ వ్యవస్థ ఉనికికే గొడ్డలి పెట్టు.. కాబట్టి, ఈ విషయంలో న్యాయ వ్యవస్థ స్పందించి, ఇలాంటి రుగ్మతలకు ప్రబలకుండా నిర్మూలన చేయడమే కాదు, ఇలాంటివి జరగకుండా కఠినమైన, చట్టపరమైన చర్యలు వుండాలని కోరుకుంటున్నాము..’ అని శాంతి ప్రసాద్‌ అభిప్రాయపడ్డారు.