పోలీసులపై రాజకీయ ఆరోపణలు.. కొత్త కథేమీ కాదు!

రాజకీయ నాయకులకు పోలీసులు సాఫ్ట్ టార్గెట్‌గా మారుతుంటారన్నది ఓపెన్ సీక్రెట్. అధికారంలో ఎవరుంటే వారికి అనుకూలంగా పోలీసు వ్యవస్థ పనిచేయడం.. అనే ఆరోపణలు కూడా కొత్త వ్యవహారం కాదు. చంద్రబాబు హయాంలోనూ ఇలాంటి ఆరోపణలు విన్నాం. పోలీసు శాఖలో ఉన్నత పదవులు చేపట్టినవారు, ఆ తర్వాత రాజకీయాల్లోకి రావడం, పోలీసు శాఖలో అంత స్థాయికి ఎదిగేందుకు కారణమైన రాజకీయ పార్టీల రుణం తీర్చుకోవడం.. ఇలాంటి అంశాలపై చాలాకాలంగా చాలా రాజకీయ నాయకుల నుంచి చాలా చాలా కామెంట్లు వింటూనే వున్నాం.

ఇప్పడిదంతా ఎందుకంటే, తన జీవితం ఇంతకు ముందెన్నడూ వినని స్థాయిలో పోలీసులపై రాజకీయ విమర్శలు ఎక్కువైపోయాయంటూ ఆంధ్రపదేశ్ పోలీస్ బాస్.. అదేనండీ డీజీపీ గౌతమ్ సవాంగ్ తీవ్ర ఆవేదన వ్యక్తం చేశారు. నిజమే, గౌతమ్ సవాంగ్ అంటే సిన్సియర్ పోలీస్ ఆఫీసర్ అనే పేరుంది. చంద్రబాబు హయాంలోనే గౌతమ్ సవాంగ్ పేరు మార్మోగిపోయింది నిజాయితీకి నిలువెత్తు నిదర్శనమని. కానీ, ఆయన డీజీపీ అయ్యాక.. పోలీసు వ్యవస్థ పలు మార్లు న్యాయ వ్యవస్థ నుంచి మొట్టికాయలేయించుకున్న వైనాన్ని ఎలా విస్మరించగలం.?

చంద్రబాబు హయాంలో వైసీపీ, పోలీసు వ్యవస్థ మీద అభ్యంతకరమైన రీతిలో ఆరోపణలు చేసింది. ‘ఖాకీ చొక్కాలు తీసేసి, పచ్చ చొక్కాలు వేసుకోండి..’ అని కొందరు వైసీపీ నేతలు అప్పట్లో పోలీసులపై విరుచుకుపడ్డారు. ఇప్పుడు టీడీపీ నేతలు అవే తరహా ఆరోపణలు ప్రస్తుత పోలీసు అధికారులపై చేస్తున్నారు. అధికారంలో వున్నోళ్ళు ప్రతిపక్షంలోకి వచ్చారు.. ప్రతిపక్షంలో వున్నోళ్ళు అధికారంలోకి వచ్చారు.. రాజకీయ ఆరోపణలు మాత్రం సేమ్ టు సేమ్. జరుగుతున్న పరిణామాలపై పోలీసులే ఆత్మవిమర్శ చేసుకోవాల్సి వుందిప్పుడు.

ఎందుకంటే, రాజకీయ నాయకుల నాలిక రెండు రకాలుగా వ్యవహరిస్తుంటుంది. రేప్పొద్దున్న వైసీపీ ప్రతిపక్షానికి పరిమితమైతే, పోలీసు వ్యవస్థ మీద విమర్శలు చేయకుండా వుంటుందా.? ‘మాకు ఏపీ పోలీసుల మీద నమ్మకం లేదు’ అని వైసీపీ ప్రతిపక్షంలో వున్నప్పుడు ఎన్నిసార్లు విమర్శించింది.? పోలీసు అధికారులకు కులాన్ని ఎన్నిసార్లు ఆపాదించింది. రాజకీయాల్లో ఇవన్నీ తప్పవు అంతే.!