ఢిల్లీ టైమ్స్‌: జగన్‌కి ‘ఆ’ విషయంలో గ్రీన్‌ సిగ్నల్‌

ఆంధ్రప్రదేశ్‌లో రాజకీయ శక్తిగా ఎదిగేందుకు భారతీయ జనతా పార్టీ విశ్వ ప్రయత్నాలూ చేస్తోంది. అయితే, ప్రతిపక్షం తెలుగుదేశం పార్టీని నాశనం చేయడం ద్వారా మాత్రమే తమకు అక్కడ ‘స్కోప్‌’ దొరుకుతుందన్న కోణంలో.. పరిస్థితుల్ని ఎప్పటికప్పుడు అంచనా వేస్తూ, ఆచి తూచి అడుగులేస్తోంది కమలదళం.

ఇదిలా వుంటే, కొత్తగా జనసేనతో పొత్తు పెట్టుకున్న బీజేపీ, మూడు రాజధానుల విషయంలో రెండుగా చీలిపోయిన విషయం విదితమే. ఆంధ్రప్రదేశ్‌లో బీజేపీ నేతలు కొందరు, రాజధాని పూర్తిగా అమరావతిలోనే వుండాలంటున్నారు. కొందరేమో హైకోర్టు విషయంలో రాయలసీమకు న్యాయం జరగాలంటున్నారు. కొత్తగా ఇంకొందరేమో విశాఖకు ఎగ్జిక్యూటివ్‌ రాజధాని వస్తే తప్పేంటని ప్రశ్నిస్తున్నారు. అంటే, రెండు కాదు.. మూడు విధానాలు బీజేపీలో కన్పిస్తున్నాయన్నమాట.

కాగా, తాజా రాజకీయ పరిణామాల నేపథ్యంలో ముఖ్యమంత్రి వైఎస్‌ జగన్‌, ఢిల్లీ పెద్దలతో మంతనాలకు తెరలేపినట్లు తెలుస్తోంది. రాజ్యసభ సభ్యుడు విజయసాయిరెడ్డి నేతృత్వంలో వైసీపీ బృందం ఢిల్లీకి వెళ్ళబోతోందట. కేంద్రంలోని పలువురు పెద్దల్ని ఈ బృందం కలవనున్నారట. ఢిల్లీ నుంచి సానుకూల సంకేతాలు అందాకే ఈ టీమ్‌ ఢిల్లీకి వెళ్ళనుందని చెబుతున్నారు.

అభివృద్ధి – పాలనకు సంబంధించి వికేంద్రీకరణపై కేంద్ర ప్రభుత్వ పెద్దల నుంచి తమకు ఎప్పుడో ‘గ్రీన్‌ సిగ్నల్‌’ వచ్చేసిందని సాక్షాత్తూ వైసీపీ అధికార ప్రతినిథులు చెబుతున్న విషయం విదితమే. కానీ, ఓ రాజకీయ పార్టీగా బీజేపీ, వైసీపీతో రాష్ట్రంలో ‘డమ్మీ ఫైట్‌’ చేయక తప్పడంలేదు. ఈ మొత్తం వ్యవహారం జనసేన పార్టీకి చికాకు తెప్పిస్తున్నా.. ఆల్రెడీ బీజేపీతో పొత్తుకు కమిట్‌ అయిపోయిన జనసేనాని ఏం చేయాలో పాలుపోని పరిస్థితుల్లో వున్నారట.