దారుణం: ఆంబులెన్స్ నుంచి జారిపడిన కరోనా మృతదేహం

కరోనా రెండో దశ ప్రళయానికి మరణాలు ఎక్కువగా సంభవిస్తున్నాయి. స్మశానాల్లో ఖాళీ ఉండటం లేదు.. మృతదేహాలు గుట్టలుగా పేరుకుంటున్నాయి.. మృతదేహాలను తీసుకొస్తున్న ఆంబులెన్సులు క్యూలు కడుతున్నాయి. ఈ నేపథ్యంలో కోవిడ్-19 బాధితుల మృతదేహాలను తరలించడంలో అధికారుల నిర్లక్ష్యం ఎలా ఉందో తెలిపే ఘటన మధ్యప్రదేశ్‌లో శుక్రవారం జరిగింది.

విదిషా జిల్లాలో అటల్ బిహారీ వాజ్‌పేయి ప్రభుత్వ వైద్య కళాశాల సమీపంలో ఓ ఆసుపత్రి నుంచి ఆంబులెన్సులో శ్మశానవాటికకు తరలిస్తున్నారు. ఈ క్రమంలో ఓ కరోనా మృతదేహం కిందపడిపోయింది. డ్రైవర్ అధిక వేగంతో వాహనాన్ని మలుపు తిప్పడంతో అంబులెన్స్ కు గేట్ తగిలి విరిగిపోయింది. ఈక్రమంలోనే మృతదేహం ఎగిరి రోడ్డుపై పడింది.

దీన్ని గమనించిన కోవిడ్ -19 రోగుల బంధువులు ఆసుపత్రి బయటకి వచ్చి హాస్పిటల్‌ తీరుపై ఆందోళన చేపట్టారు. ఇందుకు సంబధించిన వీడియో ప్రస్తుతం నెట్టింట్లో వైరల్ అవుతోంది. విధిశా జిల్లాలో కోవిడ్‌ మరణాలు అధికమయ్యాయి. ప్రతిరోజూ 20 నుంచి 25 మంది కరోనాతో ప్రాణాలు కోల్పోతున్నారు.