సీఎం సారొచ్చారు.! జనాలకి నరకం చూపించేశారు.!

ఎయిర్ పోర్టులో విమానమెక్కేందుకు వచ్చే ప్రయాణీకులు లగేజీలు పట్టుకుని రోడ్ల మీద ఆపసోపాలు పడుతూ పరిగెత్తడం ఏనాడైనా చూశామా.? రోడ్లపై ‘ప్రముఖుల రాక’ నేపథ్యంలో మూడు నాలుగు గంటలపాటు ట్రాఫిక్ నరకాన్న అనుభవించాల్సి వస్తే ఆ పరిస్థితి ఎలా వుంటుంది.?

ముఖ్యమంత్రి వస్తున్నారు కాబట్టి.. అంటూ, దుకాణాల్ని మూసేయడం అనేది ఇటీవలి కాలంలో ఆంధ్రప్రదేశ్‌లో పరిపాటిగా మారిపోయింది. తాజాగా విశాఖపట్నంలో ముఖ్యమంత్రి వైఎస్ జగన్ మోహన్ రెడ్డి పర్యటన సందర్భంగా కీలకమైన ప్రాంతాల్లో దుకాణాల్ని బలవంతంగా మూసేయించారు.. ఒక్క లిక్కర్ షాపులు తప్ప.!

ముఖ్యమంత్రికి తెలిసే ఇదంతా జరుగుతుందని అనగలమా.? ఏమోగానీ, అధికారుల అత్యుత్సాహమైతే సుస్పష్టంగా కనిపిస్తోందిక్కడ. ఈ వ్యవహారంపై ముఖ్యమంత్రికి కూడా ‘చికాకు’ అనిపించి వుండొచ్చు. ప్రజల్ని ఇబ్బంది పెడతారా.? ఇదేం పద్ధతి.? అంటూ అధికారులపై ముఖ్యమంత్రి గుస్సా అయ్యారట. ఈ మేరకు రాష్ట్ర డీజీపీకి ముఖ్యమంత్రి వైఎస్ జగన్ స్పష్టమైన ఆదేశాలిచ్చారట.

అమరావతి ప్రాంతంలో ముఖ్యమంత్రి కాన్వాయ్ వెళుతోంటే, ఎలాంటి అవాంఛనీయ సంఘటనలూ జరగకుండా ఆ మార్గంలో దుకాణాల్ని మూసేయించడం, రోడ్లకు ఇరువైపులా బారికేడ్లు పెట్టడం, ‘వలలు’ ఏర్పాటు చేయడం.. తరచూ వివాదాస్పదమవుతున్న విషయం విదితమే.

తప్పుదు, ముఖ్యమంత్రికి భద్రత కల్పించాల్సిన బాధ్యత పోలీసు విభాగానిదే. కానీ, ప్రజల్ని ఇబ్బంది పెట్టేలా ముఖ్యమంత్రికి భద్రత కల్పించడమా.? ఇదెక్కడి చోద్యం.? ఆ ప్రజలే లేకపోతే, ముఖ్యమంత్రి పదవి ఎక్కడిది.?