చిరంజీవి ‘మెగా’ రాజకీయం.. ఏది నిజం.?

మెగాస్టార్‌ చిరంజీవి, మళ్ళీ రాజకీయాలకు దగ్గరయ్యే ప్రయత్నంలో వున్నారా.? సినిమాల్ని కాదనుకుని, రాజకీయాల్లోకి వెళ్ళి.. రాజకీయాల్లో నానా రకాల విమర్శలూ ఎదుర్కొన్న చిరంజీవి, తిరిగి సినిమాల్లోకొచ్చాక.. ‘అందరివాడు’ అని మళ్ళీ కీర్తింపబడుతున్న విషయం విదితమే. ఈ తరుణంలో మళ్ళీ చిరంజీవి రాజకీయాల్లో యాక్టివ్‌ అవుతారని అనుకోగలమా.? కానీ, ఇటీవల ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డిని చిరంజీవి కలవడం, తాజాగా ఢిల్లీలో చిరంజీవి హల్‌చల్‌ చేస్తుండడం.. వెరసి, మెగా అభిమానుల్లో కొన్ని సందేహాలు మాత్రం కలుగుతున్నాయి.

‘సైరా నరసింహారెడ్డి’ సినిమా చూడాల్సిందిగా జగన్‌ని చిరంజీవి కోరిన విషయం విదితమే. జగన్‌ సైతం, చిరంజీవిని ‘లంచ్‌ మీటింగ్‌’కి ఆహ్వానించడం అందర్నీ విస్మయానికి గురిచేసింది. ఇక, ఉపరాష్ట్రపతి వెంకయ్యనాయుడుతో చిరంజీవి ఈ రోజు సమావేశమయ్యారు. పలువురు బీజేపీ పెద్దలు, చిరంజీవి వెంట ఢిల్లీ టూర్‌లో కన్పించడం గమనార్హం. గత కొంత కాలంగా చిరంజీవితో టచ్‌లో వున్న బీజేపీ సీనియర్‌ నేత రామ్‌ మాధవ్‌, చిరంజీవిని ఢిల్లీలో కలిశారు. కాదు కాదు, రామ్‌ మాధవ్‌ స్వయంగా చిరంజీవిని ఢిల్లీకి తీసుకెళ్ళారన్న ప్రచారమూ జరుగుతోంది.

చిరంజీవి గతంలో కేంద్ర మంత్రిగా పనిచేసిన విషయం విదితమే. రాజ్యసభకు గతంలో ప్రాతినిథ్యం వహించిన చిరంజీవికి మరోమారు రాజ్యసభ సీటు ఇచ్చేందుకు బీజేపీ సుముఖంగానే వుంది. అయితే అప్పట్లో ఆయన కాంగ్రెస్‌ నుంచి ప్రాతినిథ్యం వహించారు. మారిన రాజకీయ సమీకరణాల నేపథ్యంలో చిరంజీవి అవసరం భారతీయ జనతా పార్టీకి చాలానే వున్న మాట వాస్తవం. అయితే, చిరంజీవి మాత్రం రాజకీయాల పట్ల మరీ అంత ఎక్కువ ఆసక్తి చూపడంలేదు.

ఇదిలా వుంటే, తమ్ముడు పవన్‌ కళ్యాణ్‌ కోసం చిరంజీవి తెరవెనుక రాజకీయాలు చక్కబెడ్తున్నారన్న ఊహాగానాలూ లేకపోలేదు. జనసేనతో కలిసి పనిచేసేందుకు బీజేపీ ప్రయత్నిస్తున్న మాట వాస్తవం. అయితే, పవన్‌ గతంలోలా బీజేపీతో కలిసేందుకు సుముఖత వ్యక్తం చేయడంలేదు. ఏమో, రాజకీయాల్లో ఏదైనా సాధ్యమే. ఇంతకీ, చిరంజీవి ‘యాత్రలు’ కేవలం తన సినిమా ‘సైరా నరసింహారెడ్డి’ నిమిత్తమేనని సరిపెట్టుకోవాల్సిందేనా.?