మెగాస్టార్ బర్త్ డే స్పెషల్స్: ‘పునాదిరాళ్లు’తో బలమైన పునాది వేసుకున్న చిరంజీవి

డైనమిక్ హీరో, సుప్రీం హీరో, మెగాస్టార్, మేచో మెగాస్టార్.. ఇవన్నీ సినీ రంగంలో చిరంజీవి కీర్తి కిరీటాలు. అభిమానులు, సినీ పరిశ్రమ, ట్రేడ్ సైతం చిరంజీవి నటన, డ్యాన్సు, ఫైట్స్ లో చూపిన వేగానికి మురిసిపోయారు. తొలి సినిమా ‘పునాదిరాళ్లు’ టైటిల్ లానే చిన్న స్థాయి నుంచి ఉన్నత శిఖరానికి చేరుకునేందుకు బలమైన పునాదే వేసుకున్నారు. ‘పునాదిరాళ్లు’ తొలి సినిమాగా 1978 ఫిబ్రవరి 11న ప్రారంభమైనా.. 1979 జూన్ 21న ఆయన 7వ సినిమాగా విడుదలైంది. అప్పటికే చిరంజీవి పేరు పరిశ్రమలో వినిపిస్తున్నా.. ‘పునాదిరాళ్లు’ షూటింగ్ సమయంలో పరిశ్రమకు.. చిత్ర విజయంతో ప్రేక్షకులకు మరింత చేరువయ్యారు.

ఒరిజినాలిటీ కోసం

తూర్పు గోదావరి జిల్లా ‘దోసకాయలపల్లి’లో చిరంజీవి తొలిసారి కెమెరా ముందుకు వచ్చారు. ఫిల్మ్ ఇనిస్టిట్యూట్ విద్యార్ధిగా నేర్చుకున్న ధియరీ కాకుండా.. ఆన్ లొకేషన్ లో ప్రాక్టికల్స్ లోనే చిరంజీవి తన ప్రత్యేకత చాటారు. చిత్రీకరణలో ఒక సన్నివేశాన్ని దర్శకుడు చెప్పగానే.. మిగిలిన నటులకు భిన్నంగా, దర్శకుడు ఎటువంటి సూచన ఇవ్వకపోయినా కేవలం సన్నివేశాన్ని ఊహించుకుని చిరంజీవే స్వయంగా కాళ్లకు మట్టి, గడ్డిని రాసుకుని వచ్చారట. చిరంజీవి చేసిన పనిని చూసిన కెమెరామెన్ పిఎస్.నివాస్ ఆశ్చర్యపోయారట. అవసరం లేదని చెప్పినా.. సీన్ లో ఒరిజినాలిటీ కోసం రాసుకున్నానని చెప్పారట. అంతటి అంకితభావాన్ని చిరంజీవి తన తొలి సినిమా షూటింగ్ సమయంలోనే చూపించి పరిశ్రమ దృష్టిని ఆకర్షించారు.

తొలి సినిమానే ప్రముఖులతో..

గూడపాటి రాజ్ కుమార్ దర్శకత్వంలో ధర్మ విజయా పిక్చర్స్ బ్యానర్ పై క్రాంతి కుమార్ నిర్మాణ సారధ్యంలో నరసింహారాజు ప్రధాన పాత్రలో నటించగా.. చిరంజీవి మొదటి సినిమా ప్రారంభమైంది. పరిశ్రమలో ఉద్దండులైన మహానటి సావిత్రి, కేవీ చలం, ప్రముఖులుగా వెలుగొందుతున్న రోజా రమణి, కవిత, గోకిన రామారావు.. వంటి సీనియర్లు సినిమాలో నటిస్తున్నారు. తొలి సినిమాలోనే దాదాపు అగ్రనటులతో నటించారు చిరంజీవి. గ్రామలే దేశానికి పట్టుగొమ్మలు, గ్రామాల్లో పేదలపై మోతుబరుల దౌర్జన్యాలను ఎదుర్కొనే యువకులుగా చిరంజీవి తదితరులు నటించారు.

ప్రత్యేకత చూపడంతోనే ఎంపిక

పునాదిరాళ్లు సినిమా కోసం జరిగిన నటీనటుల ఎంపికలో చిరంజీవి చూపిన వైవిధ్యమైన ప్రదర్శనను పరిగణలోకి తీసుకునే ఎంపిక చేసుకున్నారు. స్వతహాగా సినిమాలో రక్తం ఉడుకుతున్న యువకుడి పాత్ర. చిరంజీవి కళ్లు పలికిస్తున్న భావాలు, అన్యాయాన్ని ఎదిరించే క్రమంలో కావాల్సిన నటన, పలకాల్సిన సంభాషణలు, ముఖంలో చూపించే భావాలు దర్శక, నిర్మాతలకు చిరంజీవిని తమ సినిమాలోకి తీసుకునేలా చేశాయి. ఆ ప్రత్యేకతను చిరంజీవి తన నటన, హావభావాలతో పునాదిరాళ్లులో స్పష్టంగా చూపించారు. దీంతో సినిమాలో సహచర నటుల మధ్యలో కూడా చిరంజీవి ప్రత్యేకంగా కనిపించి పేరు తెచ్చుకున్నారు.

పరిశ్రమ, ప్రేక్షకులు మెచ్చేలా..

ప్రాణం ఖరీదు తర్వాత పునాదిరాళ్లు విడుదలయ్యే సమయానికి మధ్యలో తొమ్మిది నెలల కాలంలో చిరంజీవి నటించిన ఆరు సినిమాలు విడుదలయ్యాయి. దీంతో పునాదిరాళ్లు విడుదలయ్యే తేదీకి చిరంజీవి పేరు పరిశ్రమలో వినిపిస్తోంది. దీంతో చిరంజీవిపై దర్శక, నిర్మాతలతోపాటు ప్రేక్షకులు కూడా చిరంజీవిని ప్రత్యేకంగా చూడటం ప్రారంభించారు. అభ్యుదయ భావాల నేపథ్యంలో తెరకెక్కిన పునాదిరాళ్లు విజయం సాధించడంతోపాటు నంది అవార్డు కూడా దక్కింది. తెలుగు చిత్ర పరిశ్రమలో నిలదొక్కకునేలా చిరంజీవికి పూల బాట పరచింది.