ఎలిమినేషన్ కోసం జరిగే నామినేషన్లు అంటే ఎలా వుండాలి.? ఏ కంటెస్టెంట్ ఎందుకు హౌస్లోంచి బయటకు వెళ్ళిపోవాలన్నదానిపై సరైన అభిప్రాయం, నామినేట్ చేసే కంటెస్టెంట్కి వుండాలి. కానీ, అలాంటివేమీ అక్కర్లేకుండానే సిల్లీ నామినేషన్లు చేసేసుకుంటున్నారు ఈ సీజన్ కంటెస్టెంట్లు. గత సీజన్లు కాస్త బెటర్ అనిపించేలా వుందిప్పుడు పరిస్థితి.
వాస్తవానికి ఏడో సీజన్ తెలుగు బిగ్ బాస్ రియాల్టీ షో ఒకింత ఆసక్తికరంగా మొదలై, ఆ తర్వాత చప్పగా మారిపోయింది. తాజా ఎపిసోడ్లో అంతకు ముందు రోజు జరిగిన నామినేషన్ల పర్వానికి కొనసాగింపు చోటు చేసుకుంది.
‘బొంగులోది..’ అంటాడు డాన్స్ మాస్టర్ సందీప్. ‘బొంగు’ అంటే, ‘కట్టె’ మాత్రమేనట.! అలాగని, అందర్నీ నమ్మించే ప్రయత్నం చేశాడాయన. ఇంకోపక్క, ‘నా కొడకా’ అంటూ అమర్ దీప్ నోరు జారేశాడు. ఆ తర్వాత చెప్పిన క్షమాపణ కూడా అత్యంత వెటకారం.! షరామామూలుగానే నామినేషన్ చేసేటప్పుడు, చాలా జుగుప్సాకరంగా ప్రవర్తించాడు పల్లవి ప్రశాంత్.
ఎవరు ఎందుకు ఎవర్ని నామినేట్ చేస్తున్నారో అర్థం కాని పరిస్థితి. పల్లవి ప్రశాంత్ – అమర్ మధ్య నామినేట్ వ్యవహారం జరుగుతున్నప్పుడు పక్కన భోలే షావలి – శోభా శెట్టి వాగ్యుద్ధం షురూ అయ్యింది. ఇంకో వైపు గౌతమ్ కూడా రంగంలోకి దిగేశాడు. అమర్ తలపట్టుక్కూర్చున్నాడు.
పల్లవి ప్రశాంత్ – శివాజీ మధ్య బంధం అందరికీ తెలిసిందే. శివాజీ కూడా ఈసారి మాట దొర్లేశాడు. ‘ఎవరో ఒకర్ని కొట్టే బయటకు వెళతాను..’ అంటున్నాడు శివాజీ. ఈ సీజన్లో బిగ్ బాస్ అలా డిసైడ్ చేశాడేమో.! ‘ఛండాలం’ అనే మాట కూడా చిన్నదే అవుతుందేమో.. ఈ తరహా నామినేషన్ల వ్యవహారం.
ఛండాలమంతా అయిపోయాక, ‘మీరు వాడే పదాలు ఇబ్బందికరంగా వుండకూడదు.. వేరే అర్థాలు వచ్చేలా వుండకూడదు’ అంటూ ఓ పనికిమాలిన సూచన, బిగ్ బాస్ ఇచ్చేశాడు కంటెస్టెంట్లకి.!