తెలంగాణలో వైఎస్ షర్మిల అరెస్టయ్యారు.. ఒకసారి కాదు, పలుమార్లు అరెస్టయ్యారు.! కొన్ని సందర్భాల్లో కుమార్తె కోసం వైఎస్ విజయమ్మ మీడియా ముందుకొచ్చారు. తెలంగాణ పోలీసులపై గుస్సా అయ్యారు. కుమార్తె షర్మిలకు మద్దతుగా ఆందోళన కార్యక్రమాల్లో కూడా వైఎస్ విజయమ్మ పాల్గొన్న సంగతి తెలిసిందే.
మరి, ఆంధ్ర ప్రదేశ్ రాజకీయాల్లో వైఎస్ విజయమ్మ జాడ కనిపించడం లేదేం.? కుమార్తె షర్మిలను ఆంధ్ర ప్రదేశ్ పోలీసులు అరెస్టు చేస్తే, కనీసం ఖండన ప్రకటన కూడా వైఎస్ విజయమ్మ నుంచి రాలేదు. కారణం, ఆంధ్ర ప్రదేశ్ ప్రభుత్వాన్ని తన కుమారుడు వైఎస్ జగన్ నడుపుతుండడమేనా.?
‘జగన్తో సంబంధమేముంది.?’ అని తెలంగాణ రాజకీయాల్లో ప్రశ్నించిన విజయమ్మ, ఏపీ రాజకీయాల విషయానికొచ్చేసరికి కొడుకు ‘సైడ్’ తీసుకున్నట్లు కనిపిస్తోంది. మరి, కుమార్తె వైఎస్ షర్మిల సంగతేంటి.?
‘నాన్న పైనుండి బాధపడుతున్నారు.. అమ్మ ఇక్కడే వుండి బాధపడుతుంది..’ అంటూ తన అరెస్టు విషయమై వైఎస్ షర్మిల ఆవేదన వ్యక్తం చేశారండోయ్.! ప్రభుత్వానికి వినతి పత్రం ఇచ్చేందుకు ప్రయత్నిస్తే, తనను అకారణంగా అరెస్టు చేశారన్నది షర్మిల ఆరోపణ.
‘ముఖ్యమంత్రి లేడు.. మంత్రులు లేరు.. చీఫ్ సెక్రెటరీ కూడా లేరు.. ఇదేం ప్రజాస్వామ్యం.?’ అంటూ మండిపడ్డారు వైఎస్ షర్మిల.
షర్మిలను తెలంగాణలో అరెస్టు చేసిన కేసీయార్ సర్కారు కూలిపోయింది. మరి, ఆంధ్ర ప్రదేశ్లోనూ షర్మిలను అరెస్టు చేసిన జగన్ సర్కారు కూలిపోతుందా.? ఏపీ కాంగ్రెస్ నేతలు తమ పీసీసీ అధ్యక్షురాలు షర్మిల అరెస్టుపై ఇదిగో, ఇలాంటి డౌటానుమానాలే తెరపైకి తెస్తున్నారు.