అనసూయ ‘ఆంటీ’ గోల: ఎన్ని అరెస్టులు జరుగుతాయో.!

ఒకటా.? రెండా.? యాభై వేలకు పైగా ట్వీట్లు.. ఇది కేవలం ట్విట్టర్ హంగామా మాత్రమే.! ఫేస్‌బుక్, ఇన్‌స్టాగ్రామ్ సహా ఇతర సామాజిక మాధ్యమాల సంగతి వేరు. ఇదంతా కేవలం ‘ఆంటీ’ చుట్టూ జరుగుతున్న గోల.! ‘లైగర్’ సినిమా విషయంలో అనసూయ భరద్వాజ్ ఎప్పుడైతే ‘ఉసురు’ అంటూ వ్యాఖ్యానించిందో, ఆ తర్వాతి ను రచ్చ షురూ అయ్యింది. అగ్నికి ఆజ్యం పోసినట్లు, బ్యాక్ టు బ్యాక్ అనసూయ ట్వీట్లేస్తూనే వుంది.. దానికి తగ్గట్టుగా నెటిజన్లూ పెద్దయెత్తున ఆ ట్వీట్లపై స్పందిస్తూనే వున్నారు.

అసలెందుకిదంతా.? అన్నది ఓ చర్చ. అనసూయ ఆవేదనలో కొంత వాస్తవం వుంది. అదే సమయంలో ఆమె చేస్తున్నది కేవలం పబ్లిసిటీ స్టంట్.. అనే విమర్శ కూడా లేకపోలేదు. ఎవరి గోల వారిది. ‘ఏజ్ షేమింగ్’ అంటోంది అనసూయ. నిజమే, ‘ఆంటీ’ అంటూ ఆమెను వెటకారం చేయడమేంటి.? పిల్లల్ని వివాదంలోకి లాగడమేంటి.? భర్త మీదా బాడీ షేమింగ్ చేయడమేంటి.? నిజమే, ఆన్‌లైన్ అబ్యూజ్ అనేది సమర్థనీయం కాదు.

కానీ, నెటిజనం సంధిస్తున్న బూతులతో కూడిన ట్వీట్లను ప్రస్తావిస్తూ, వాటి మీద మళ్ళీ ట్వీట్లేయడం ఎంతవరకు సబబు.? అన్నదానిపై అనసూయ భరద్వాజ్ తనను తాను ప్రశ్నించుకుంటే మంచిది. కేసులు పెడతా.. అని బెదిరించడం కంటే, ఆ పనేదో చేసేస్తే.. ఇలాంటి చెత్త ట్వీట్లు వేసేవాళ్ళు ఒకింత భయపడతారేమో.!

ఎవరు ఔనన్నా ఎవరు కాదన్నా, ‘సోషల్ అబ్యూజ్’ అనేది క్యాన్సర్ కంటే దారుణంగా తయారైంది. ముఖ్యమంత్రులు, ప్రధాన మంత్రులే ఈ సోషల్ అబ్యూజ్‌కి అతీతం కానప్పుడు, సెలబ్రిటీలు ఏం చేసినా.. ఫలితం వుంటుందని ఎలా అనుకోగలం.? ఏపీ, తెలంగాణల్లోనే కాదు, దేశవ్యాప్తంగా రాజకీయ ప్రముఖులపైనా, సినీ ప్రముఖులపైనా నిత్యం ట్రోలింగ్ జరుగుతూనే వుంటుంది. అడపా దడపా అరెస్టులు జరుగుతూనే వుంటాయ్. దీన్ని ఆపడం సాధ్యం కాదు కూడా.

అనసూయ గతంలోనూ ఇలాంటి ట్రోలింగ్ ఎదుర్కొంది.. అప్పట్లోనూ పోలీసుల్ని ఆశ్రయించింది. ఇప్పుడు వీలైనంత ఎక్కువ ‘స్పేస్’ ఇచ్చి, ఎక్కువమందిపై ఫిర్యాదు చేయాలని అనసూయ అనుకుంటోందిట. అంటే, బోల్డన్ని అరెస్టులు జరుగుతాయనీ భావించొచ్చేమో.

సినిమాల్లో అయినా, ‘పాత్రలు కల్పితం’ అని చెప్పి, ఎవరో ఒకర్ని టార్గెట్ చేసుకుని ఆయా పాత్రల్ని అత్యంత జుగుప్సాకరంగా చూపించడంలేదా.? అలాంటి పాత్రల్లో నటిస్తోన్న సెలబ్రిటీలను ఏమనాలి.? వారిపైనా కేసులు నమోదు చేయాల్సి వస్తే.? ‘అబ్బే, అది నటన మాత్రమే..’ అని తప్పించుకోవడం సోకాల్డ్ సెలబ్రిటీలకు అలవాటైపోయింది.

సమంత మీద ఎంత దారుణమైన ట్రోలింగ్ జరిగింది.. నిహారిక మీద ఎంతటి పైత్యం ప్రదర్శించబడింది.. చెప్పుకుంటూ పోతే లిస్టు చాలా చాలా చాలా చాలా పెద్దదే. ఆ మాటకొస్తే, ట్రోలింగ్ బారిన పడని నటి, నటుడు, రాజకీయ నాయకుడు, దర్శకుడు, నిర్మాత.. వుండరనడం అతిశయోక్తి కాదు.